ഇയ്യിടെയായി ഏതൊക്കെയോ ഭയങ്ങളുടെ കൊല്ലിയിലേക്കിടറി വീഴുന്നു

എവിടെയുമെപ്പോഴുമാരോ പിന്തുടരുന്നതു പോലെ

അകത്തും പുറത്തുമെത്തുന്നിടത്തും

പോകുന്നിടത്തുമെല്ലാം

നോക്കും വാക്കും ചിന്തയുമിഷ്ടാനിഷ്ടങ്ങളുമെല്ലാമാരോ വായിച്ചെടുക്കുന്നതു പോലെ,

ഓരോചിരികൾക്കു പിന്നിലുമൊരു

കത്തിയുടെ വായ്ത്തല മിന്നുന്ന പോലെ...

എവിടെയോ നിറച്ചു വെച്ചൊരു തോക്ക്,

സ്വന്തം നിഴൽ പോലുമൊരൊറ്റുകാരനായേക്കാം

പേടിയാണ്... എന്തിനുമേതിനും

'ഞാൻ' എന്ന ഒന്നരയക്ഷരത്തിൽ

തേഞ്ഞുപോയൊരു വാക്കിന്റെ പിടച്ചിൽ

കൊക്കികൊക്കിയൊരുചുമപോലെയോ

ഒരുനീരുളുക്കുപോലെയോ, അലോസരപ്പെടുത്താറുണ്ടെങ്കിലും

ഇപ്പോഴതൊരു ശീലമായിരിക്കുന്നു.

പേടിച്ചുപേടിച്ചീപ്പേടിയുമൊരു ശീലമായേക്കാം

ചിലപ്പോളൊരുതോന്നലായേക്കാം

പതിയെപ്പതിയെ ഞാനും വെറുമൊരു തോന്നലായേക്കാം..