യുഎസ് ഓപ്പണിന്റെ ആദ്യ റൗണ്ടിലേക്ക് എത്തി തന്നെ ഇന്ത്യന്‍ യുവതാരം സുമിത് നാഗല്‍ ആരാധകരുടെ ശ്രദ്ധ തന്നിലേക്കെത്തിച്ചു. സാക്ഷാല്‍ റോജര്‍ ഫെഡററെ ആദ്യ സെറ്റില്‍ മലര്‍ത്തിയടിക്കുക കൂടി ചെയ്തതോടെ താന്‍ ചില്ലറക്കാരനല്ലെന്ന് തെളിയിക്കുകയാണ് സുമിത് ഇപ്പോള്‍. രണ്ടാം സെറ്റില്‍ പിന്നോട്ട് പോയെങ്കിലും ഫെഡറര്‍ക്കെതിരെ ഒരു പോയിന്റ് നേടാന്‍ സുമിത്തില്‍ നിന്ന് വന്ന പ്രകടനമാണ് ആരാധകരെ അമ്പരപ്പിക്കുന്നത്. 

21 ഷോട്ട് റാലിയില്‍ ഫെഡറര്‍ തന്റെ മേധാവിത്വം പുലര്‍ത്തിയിരുന്നു. അവിടെ സ്‌ട്രൈക്ക് ചെയ്യുകയായിരുന്നു സുമിത്. ഫെഡറര്‍ പോയിന്റ് നേടും എന്ന് തോന്നിച്ചിടത്ത് ബാക്ക്ഹാന്‍ഡ് ഷോട്ടിലൂടെ സുമിത്ത് അഞ്ച് വട്ടം യുഎസ് ഓപ്പണ്‍ ചാമ്പ്യനായ താരത്തെ ഞെട്ടിച്ചു. 

ഫെഡററെ വിറപ്പിച്ച ഇന്ത്യന്‍ താരത്തെ അഭിനന്ദനങ്ങള്‍ കൊണ്ട് മൂടുകയാണ് സമൂഹമാധ്യമങ്ങളില്‍ ആരാധകരിപ്പോള്‍. നേരത്തെ, ഇരുപത്തിരണ്ടുകാരനായ സുമിത് എടിപി 500 ടൂര്‍ണമെന്റില്‍ റിച്ചാര്‍ഡ് ഗസ്‌ക്വറ്റിനേയും നേരിട്ടിരുന്നു.