ചരിത്രം കുറിച്ച് സ്വര്ണവുമായി ടോക്യോയില് നിന്ന് ഇന്ത്യയിലേക്ക് മടങ്ങുന്ന നീരജ് ചോപ്രയ്ക്ക് പാരിതോഷികങ്ങള് പ്രഖ്യാപിക്കുന്നതില് മത്സരിക്കുകയാണ് രാജ്യം. ഇന്ത്യയുടെ ഒളിംപിക്സ് ചരിത്രത്തില് ആദ്യമായി അത്ലറ്റിക്സില് സ്വര്ണത്തില് മുത്തമിട്ട നീരജ് ചോപ്രയ്ക്ക് ആറ് കോടി രൂപ ഹരിയാന സര്ക്കാര് പാരിതോഷികം പ്രഖ്യാപിച്ചതിന് പിന്നാലെ വരുന്നത് സമ്മാന പെരുമഴ.
6 കോടി രൂപ പാരിതോഷികം പ്രഖ്യാപിച്ചതിന് പിന്നാലെ ക്ലാസ് വണ് ഗവണ്മെന്റ് ജോലിയും നീരജിന് മുന്പില് ഹരിയാന സര്ക്കാര് വയ്ക്കുന്നു. ഹരിയാനയില് എവിടേയും ഭൂമി തുകയില് 50 ശതമാനം ഇളവോടെ നീരജിന് സ്വന്തമാക്കാമെന്നും ഹരിയാന സര്ക്കാര് പറയുന്നു.
ഇന്ത്യയുടെ ജാവലിന് ത്രോ ഹീറോയ്ക്ക് ഒരു കോടി രൂപയാണ് ബിസിസിഐ പാരിതോഷികം പ്രഖ്യാപിച്ചത്. ടോക്യോയില് മെഡല് നേടിയ എല്ലാ താരങ്ങള്ക്കും ബിസിസിഐ അവാര്ഡ് നല്കും. 50 ലക്ഷം രൂപ വീതമാണ് ടോക്യോയില് വെള്ളി നേടിയ മീരാബായി ചാനുവിനും രവി ദഹിയക്കും ലഭിക്കുക.
വെങ്കലം നേടിയ പി വി സിന്ധു, ലവ്ലിന, ബജ്റംഗ് പൂനിയ എന്നിവര്ക്ക് 25 ലക്ഷം രൂപ വീതം ബിസിസിഐ നല്കും. വെങ്കലം നേടിയ ഇന്ത്യന് ഹോക്കി ടീമിന് 1.25 കോടി രൂപയാണ് ബിസിസിഐ സമ്മാന തുക പ്രഖ്യാപിച്ചിരിക്കുന്നത്.
ഹരിയാന സര്ക്കാരിന് പുറമെ പഞ്ചാബ് സര്ക്കാര് ഇന്ത്യയുടെ സ്വര്ണ മെഡല് ജേതാവിന് രണ്ട് കോടി രൂപ നല്കും. നീരജിന്റെ കുടുംബത്തിന് പഞ്ചാബിലും അടിവേരുകളുണ്ട്. നീരജിന് ഒരു കോടി രൂപയാണ് ചെന്നൈ സൂപ്പര് കിങ്സ് പാരിതോഷികം പ്രഖ്യാപിച്ചത്.
മണിപ്പൂര് സര്ക്കാരും ഒരു കോടി രൂപ നീരജിന് സമ്മാനം പ്രഖ്യാപിച്ചു. ഇന്ത്യയുടെ സ്വര്ണ മെഡല് ജേതാവിന് ബ്രാന്ഡ് ന്യൂ എക്സ് യുവി 700 ആണ് ആനന്ദ് മഹീന്ദ്ര പ്രഖ്യാപിച്ചിരിക്കുന്നത്. ഒരു വര്ഷത്തെ സൗജന്യ യാത്രയാണ് നീരജിന് ഇന്ഡിഗോയുടെ പാരിതോഷികം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates