അഹമ്മദാബാദ്: പേസര് മുഹമ്മദ് സിറാജിന്റെ പേരെഴുതിയ ജഴ്സി ധരിച്ചായിരുന്നു നെതര്ലന്ഡ്സിനെതിരെ ഇന്ത്യന് ഓപ്പണര് അഭിഷേക് ശര്മ കളിക്കാനിറങ്ങിയത്. പ്രകടനത്തില് മാറ്റം ഉണ്ടായാലോ എന്ന് കരുതിയാണ് ജഴ്സിയില് താരം ഭാഗ്യപരീക്ഷണം നടത്തിയത്. എന്നാല് താരത്തിന്റെ പ്രകടനത്തില് പ്രത്യേകിച്ച് ഒരു മാറ്റവും ഉണ്ടായില്ല. കഴിഞ്ഞ മത്സരത്തിലെ പോലെ പൂജ്യത്തിനാണ് അഭിഷേക് ശര്മ പുറത്തായത്.
ഇതോടെ ടി20 ലോകകപ്പില് കൂടുതല് 'ഡക്കുകളെന്ന' നാണക്കേടിന്റെ റെക്കോര്ഡില് ഇന്ത്യന് താരങ്ങളില് അഭിഷേക് ശര്മ ആശിഷ് നെഹ്റയ്ക്കൊപ്പമെത്തി. ബോളറായ നെഹ്റയും മുന്പ് മൂന്നു തവണ പൂജ്യത്തിനു പുറത്തായിട്ടുണ്ട്. ഈ ലോകകപ്പിലെ തുടര്ച്ചയായ മൂന്നാം മത്സരത്തിലാണ് താരം നിരാശപ്പെടുത്തിയത്.
അഹമ്മദാബാദില് നെതര്ലന്ഡ്സിനെതിരെ മൂന്നു പന്തുകള് നേരിട്ട അഭിഷേക് റണ്ണൊന്നും നേടാതെ പുറത്തായി. ആര്യന് ദത്തിന്റെ പന്തില് അഭിഷേകിന്റെ ലെഗ് സ്റ്റംപ് തെറിക്കുകയായിരുന്നു. യുഎസിനും പാക്കിസ്ഥാനുമെതിരായ മത്സരങ്ങളിലും അഭിഷേക് പൂജ്യത്തിനു പുറത്തായിരുന്നു. നമീബിയയ്ക്കെതിരെ താരം കളിച്ചിരുന്നില്ല. ലോകകപ്പിലെ ഗ്രൂപ്പ് ഘട്ട മത്സരങ്ങള് പൂര്ത്തിയാകുമ്പോഴാണ്, ടി20യിലെ ലോക ഒന്നാം നമ്പര് ബാറ്റര് അക്കൗണ്ട് തുറക്കാന് സാധിക്കാതെ ബുദ്ധിമുട്ടുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates