ന്യൂഡല്‍ഹി: രോഹിത്തിന് കീഴില്‍ ലോകോത്തര ടീമായി ഇന്ത്യ മാറുകയാണെന്ന കൈഫിന്റെ ട്വീറ്റ് വിവാദത്തില്‍. കോഹ് ലി ക്യാപ്റ്റനായിരുന്ന സമയത്ത് പ്രശ്‌നങ്ങളുണ്ടായിരുന്നു എന്ന് പറയാതെ പറയുന്ന കൈഫിന്റെ പരാമര്‍ശമാണ് ആരാധകരെ പ്രകോപിപ്പിക്കുന്നത്. 

കെഎല്‍, രോഹിത്, വിഹാരി, കോഹ് ലി, പന്ത്, ജഡേജ, അശ്വിന്‍, ബൂമ്ര, ഷമി പിന്നെ 11ല്‍ ഒരുപാട് ഓപ്ഷനുകളും...പെട്ടെന്ന് എല്ലാം ശരിയായത് പോലെ. രോഹിത്തിനും ദ്രാവിഡിനും കീഴില്‍ ലോകത്തെ തോല്‍പ്പിക്കുന്ന ഒരു ടെസ്റ്റ് യൂണിറ്റ് രൂപപ്പെടുകയാണ്...മുഹമ്മദ് കൈഫ് ട്വിറ്ററില്‍ കുറിച്ചു. 

കോഹ് ലി ക്യാപ്റ്റനായിരുന്ന സമയത്തെ പ്ലേയിങ് ഇലവന്‍ തന്നെയാണ് ഇപ്പോഴും. ഇതില്‍ കോഹ് ലിയുടെ സമയത്ത് ഇന്ത്യ പ്രശ്‌നങ്ങള്‍ നേരിടുകയും രോഹിത് എത്തിയതോടെ പ്രശ്‌നങ്ങളെല്ലാം നീങ്ങുകയും ചെയ്തു എന്ന രീതിയിലാണ് കൈഫിന്റെ ട്വീറ്റ്. 

ശ്രീലങ്കയെ 238 റണ്‍സിന് തോല്‍പ്പിച്ചതിന് പിന്നാലെയാണ് കൈഫിന്റെ ട്വീറ്റ് വന്നത്. കോഹ്‌ലി രൂപപ്പെടുത്തിയെടുത്ത ടെസ്റ്റ് ടീമാണ് ഇത് എന്ന് കൈഫിനെ ഓര്‍മപ്പെടുത്തുകയാണ് ആരാധകര്‍ ഇവിടെ.