നഗോയ: ഏഷ്യന്‍ ഗെയിംസില്‍ സുവര്‍ണ മുന്നേറ്റം തുടര്‍ന്ന് ഇന്ത്യ. ബോക്‌സിങിലും ഗുസ്തിയിലുമായി ഇന്ത്യ അര മണിക്കൂറിനിടെ സ്വന്തമാക്കിയത് 3 സ്വര്‍ണ മെഡലുകള്‍. ഇതോടെ ഇന്ത്യയുടെ ആകെ സ്വര്‍ണ നേട്ടം 15ല്‍ എത്തി. ആകെ മെഡല്‍ നേട്ടം 75ലും. 15 സ്വര്‍ണം, 25 വെള്ളി, 35 വെങ്കലം മെഡലുകളാണ് ഇന്ത്യയുടെ നിലവിലെ നേട്ടം. മെഡൽ പട്ടികയിൽ‌ ഇന്ത്യ അഞ്ചാം സ്ഥാനത്ത്.

പര്‍വീണ്‍ ഹൂഡ

വനിതകളുടെ 65 കിലോ വിഭാഗം ബോക്‌സിങില്‍ ഇന്ത്യയുടെ പര്‍വീണ്‍ ഹൂഡയാണ് സ്വര്‍ണം നേടിയത്. ലവ്‌ലിന ബോര്‍ഗോഹെയ്ന്‍ നേരത്തെ സുവര്‍ണ നേട്ടം ഇന്ത്യക്ക് സമ്മാനിച്ചിരുന്നു. പിന്നാലെയാണ് വനിതാ പോരില്‍ പര്‍വീണിന്റെ മുന്നേറ്റം. താരം ചൈനീസ് തായ്‌പേയിയുടെ ചെന്‍ നെയ്ന്‍ ചെനിനെ കടുത്ത പോരാട്ടത്തില്‍ വീഴ്ത്തി. 3-1നാണ് പര്‍വീണിന്റെ മുന്നേറ്റം. ഇന്ത്യക്കായി ബോക്‌സിങില്‍ ഏഷ്യന്‍ ഗെയിംസ് സ്വര്‍ണം നേടുന്ന മൂന്നാമത്തെ വനിതാ താരമായും പര്‍വീണ്‍ മാറി. നേരത്തെ മേരി കോം, ലവ്‌ലിന എന്നിവരാണ് സ്വര്‍ണം സ്വന്തമാക്കിയ ഇന്ത്യന്‍ വനിതകള്‍.

അങ്കുഷ് പംഗല്‍

പുരുഷ വിഭാഗം ബോക്‌സിങിലാണ് പിന്നാലെ ഇന്ത്യ സുവര്‍ണ നേട്ടം സ്വന്തമാക്കിയത്. ഇന്ത്യയുടെ അങ്കുഷ് പംഗല്‍ ദക്ഷിണ കൊറിയന്‍ താരം കിം മിന്‍ സ്യൂങിനെ ഇടിച്ചു വീഴ്ത്തി. പുരുഷന്‍മാരുടെ 80 കിലോ വിഭാഗത്തിലാണ് നേട്ടം. ഏകപക്ഷീയ പോരില്‍ 4-0ത്തിനാണ് ഇന്ത്യന്‍ താരം ജയവും സ്വര്‍ണവും ഉറപ്പിച്ചത്.

സുജീത് കല്‍കല്‍

പുരുഷന്‍മാരുടെ 65 കിലോ ഫ്രീസ്റ്റൈല്‍ ഗുസ്തിയിലാണ് ഇന്ത്യയുടെ അര മണിക്കൂറിനിടെയുള്ള മൂന്നാം സ്വര്‍ണം. ഇന്ത്യയുടെ സുജീത് കൽകലാണ് സ്വർണം ​ഗുസ്തി പിടിച്ച് സ്വന്തമാക്കിയത്. തജികിസ്ഥാന്‍ താരം കുദ്യേവ് അബ്ദുല്‍ മസ്ഹിദിനെയാണ് സുജീത് ഫൈനലില്‍ വീഴ്ത്തിയത്. ആദ്യ റൗണ്ട് കൈവിട്ട ശേഷം ഗംഭീര തിരിച്ചുവരവാണ് സുജീത് നടത്തിയത്. സ്‌കോര്‍: 2-9, 8-2, 10-9.