നഗോയ: അഞ്ചാമത് ഏഷ്യന്‍ പാരാ ഗെയിംസില്‍ തകര്‍പ്പന്‍ തുടക്കവുമായി ഇന്ത്യ. മത്സരങ്ങളുടെ ആദ്യദിനം തന്നെ നാല് സ്വര്‍ണവും അഞ്ച് വെള്ളിയും രണ്ട് വെങ്കലവും ഉള്‍പ്പെടെ 11 മെഡലുകള്‍ സ്വന്തമാക്കിയ ഇന്ത്യ, മെഡല്‍ പട്ടികയില്‍ നാലാം സ്ഥാനത്തെത്തി. പാരാ ഷൂട്ടിങ്, അത്ലറ്റിക്‌സ്, അമ്പെയ്ത്ത്, ജൂഡോ തുടങ്ങിയ ഇനങ്ങളിലാണ് ഇന്ത്യന്‍ താരങ്ങള്‍ മികവ് തെളിയിച്ചത്. റെക്കോര്‍ഡ് പ്രകടനങ്ങളും ഇന്ത്യന്‍ ക്യാമ്പിന് ആവേശമായി.
ലോങ് ജംപില്‍ നിഷാദ് കുമാറിന് സ്വര്‍ണം
രണ്ട് തവണ പാരാലിമ്പിക്‌സില്‍ വെള്ളി നേടിയ നിഷാദ് കുമാറാണ് ഇന്ത്യയ്ക്കായി സ്വര്‍ണം നേടിയ പ്രമുഖ താരങ്ങളിലൊരാള്‍. പുരുഷന്മാരുടെ ടി47 ലോങ് ജംപില്‍ 7.11 മീറ്റര്‍ ചാടിയാണ് നിഷാദ് ഒന്നാമതെത്തിയത്. ഈ ഇനത്തില്‍ താരത്തിന്റെ ആദ്യ അന്താരാഷ്ട്ര മത്സരമായിരുന്നു ഇത്.
ഷൂട്ടിങ്ങില്‍ മോനയ്ക്ക് റെക്കോര്‍ഡ് സ്വര്‍ണം; അവനിക്ക് വെള്ളി
വനിതകളുടെ 10 മീറ്റര്‍ എയര്‍ റൈഫിള്‍ സ്റ്റാന്‍ഡിങ് എസ്എച്ച്1 വിഭാഗത്തില്‍ മോന അഗര്‍വാള്‍ 250.0 പോയിന്റോടെ സ്വര്‍ണം നേടി. ഇതോടെ ഏഷ്യന്‍ പാരാ ഗെയിംസില്‍ പുതിയ റെക്കോര്‍ഡും മോന സ്വന്തമാക്കി. ഇന്ത്യയുടെ തന്നെ അവനി ലേഖര 249.6 പോയിന്റോടെ വെള്ളി നേടി. ഇതോടെ ഈ ഇനത്തില്‍ ഇന്ത്യയ്ക്ക് സ്വര്‍ണവും വെള്ളിയും ഒരുമിച്ച് ലഭിച്ചു. പാരാലിംപിക്‌സില്‍ മെഡല്‍ നേടിയിട്ടുള്ള മോനയുടെ ഈ നേട്ടം ഇന്ത്യന്‍ സംഘത്തിന്റെ മെഡല്‍വേട്ടയ്ക്ക് മികച്ച തുടക്കമായി.
അമ്പെയ്ത്തില്‍ ലോക റെക്കോര്‍ഡ് തിരുത്തി ശീതളും തോമന്‍ കുമാറും
പാരാ അമ്പെയ്ത്തില്‍ ശീതള്‍ ദേവിയും തോമന്‍ കുമാറും ചേര്‍ന്ന് ലോക റെക്കോര്‍ഡ് തിരുത്തിയത് ഇന്ത്യയുടെ ആദ്യദിനത്തിലെ ശ്രദ്ധേയ നേട്ടങ്ങളിലൊന്നായി. മിക്‌സ്ഡ് ടീം കോമ്പൗണ്ട് റാങ്കിങ് റൗണ്ടില്‍ ഇരുവരും ചേര്‍ന്ന് 1,402 പോയിന്റ് നേടി. നേരത്തെയുണ്ടായിരുന്ന 1,400 പോയിന്റിന്റെ ലോക റെക്കോര്‍ഡാണ് ഇന്ത്യന്‍ സഖ്യം മറികടന്നത്.
ജാവലിന്‍ ത്രോയില്‍ സ്വര്‍ണവും വെള്ളിയും
പുരുഷന്മാരുടെ ജാവലിന്‍ ത്രോ എഫ്46 വിഭാഗത്തില്‍ റിങ്കു ഹൂഡ 65.11 മീറ്റര്‍ ദൂരം കണ്ടെത്തി സ്വര്‍ണം നേടി. 65.02 മീറ്റര്‍ എറിഞ്ഞ അജീത് സിങ് വെള്ളി മെഡലും സ്വന്തമാക്കി. ഇതോടെ ഈ ഇനത്തിലും ഇന്ത്യയ്ക്ക് ഒന്നും രണ്ടും സ്ഥാനങ്ങള്‍ ലഭിച്ചു.
വനിതകളുടെ 1,500 മീറ്റര്‍ ടി12/ടി13 വിഭാഗത്തില്‍ സൗമ്യ കുമാര്‍ 5 മിനിറ്റ് 12.39 സെക്കന്‍ഡില്‍ ഫിനിഷ് ചെയ്ത് സ്വര്‍ണം നേടി. ഇതേ മത്സരത്തില്‍ 5 മിനിറ്റ് 30.90 സെക്കന്‍ഡില്‍ ഫിനിഷ് ചെയ്ത രാധ വെങ്കടേഷ് വെള്ളിയും സ്വന്തമാക്കി.
നീന്തലില്‍ പുരുഷന്മാരുടെ 100 മീറ്റര്‍ ഫ്രീസ്‌റ്റൈല്‍ എസ്13 വിഭാഗത്തില്‍ 18കാരനായ രവി കാര്‍ത്തിക് ബുഡിഗിന 56.80 സെക്കന്‍ഡില്‍ ഫിനിഷ് ചെയ്ത് വെള്ളി നേടി. വനിതകളുടെ 1,500 മീറ്റര്‍ ടി11 വിഭാഗത്തില്‍ റവന്നി വലസനൈനി 5 മിനിറ്റ് 41.85 സെക്കന്‍ഡില്‍ ഫിനിഷ് ചെയ്ത് വെങ്കലവും സ്വന്തമാക്കി. ഈ സമയവും താരത്തിന്റെ വ്യക്തിഗത മികച്ച പ്രകടനമാണ്.
പാരാ ജൂഡോയില്‍ കൊകില വെള്ളി മെഡല്‍ നേടി. പുരുഷന്മാരുടെ ജെ1 വിഭാഗം 70 കിലോഗ്രാം ക്വാര്‍ട്ടര്‍ ഫൈനലില്‍ കപില്‍ പര്‍മറും വിജയിച്ചു.
മെഡല്‍ പട്ടികയില്‍ ചൈന ഒന്നാമത്
ആദ്യദിനത്തിലെ മത്സരങ്ങള്‍ അവസാനിച്ചപ്പോള്‍ 26 സ്വര്‍ണം ഉള്‍പ്പെടെ 62 മെഡലുകളുമായി ചൈനയാണ് പട്ടികയില്‍ ഒന്നാമത്. എട്ട് സ്വര്‍ണമടക്കം 27 മെഡലുകളുമായി ജപ്പാന്‍ രണ്ടാമതും ആറ് സ്വര്‍ണമടക്കം 23 മെഡലുകളുമായി ഉസ്‌ബെകിസ്ഥാന്‍ മൂന്നാമതുമാണ്. നാല് സ്വര്‍ണം ഉള്‍പ്പെടെ 11 മെഡലുകളുമായി ഇന്ത്യ നാലാം സ്ഥാനത്തുണ്ട്. ആദ്യദിനത്തിലെ മികച്ച പ്രകടനത്തിന്റെ ആത്മവിശ്വാസത്തില്‍ വരും ദിവസങ്ങളിലും കൂടുതല്‍ മെഡലുകള്‍ നേടാനാകുമെന്ന പ്രതീക്ഷയിലാണ് ഇന്ത്യന്‍ സംഘം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates