അഡ്ലെയ്ഡ്: ഇന്ത്യക്കെതിരായ രണ്ടാം ക്രിക്കറ്റ് ടെസ്റ്റില് ട്രാവിസ് ഹെഡിനു സെഞ്ച്വറി. താരത്തിന്റെ ബാറ്റിങ് മികവില് ഓസ്ട്രേലിയ മികച്ച സ്കോര് ലക്ഷ്യമിട്ട് മുന്നേറുന്നു. എട്ടാം ടെസ്റ്റ് സെഞ്ച്വറിയാണ് ഹെഡ് അഡ്ലെയ്ഡില് കുറിച്ചത്. 111 പന്തുകള് നേരിട്ട് 10 ഫോറും 3 സിക്സും സഹിതമാണ് താരത്തിന്റെ ശതകം.
ഒടുവില് വിവരം കിട്ടുമ്പോള് ഓസ്ട്രേലിയ 5 വിക്കറ്റ് നഷ്ടത്തില് 272 റണ്സെന്ന നിലയില്. അവര്ക്ക് 92 റണ്സ് ലീഡ്. 114 റണ്സുമായി ഹെഡും 11 റണ്സുമായി അലക്സ് കാരിയും ബാറ്റിങ് തുടരുന്നു.
ഒന്നാം ഇന്നിങ്സില് ഇന്ത്യയുടെ പോരാട്ടം 180 റണ്സില് അവസാനിപ്പിച്ചാണ് ഓസ്ട്രേലിയ മറുപടി ബാറ്റിങ് ആരംഭിച്ചത്. രണ്ടാം ദിനമായ ഇന്ന് ഒരു വിക്കറ്റ് നഷ്ടത്തില് 86 റണ്സെന്ന നിലയില് ബാറ്റിങ് പുനരാരംഭിച്ച ഓസ്ട്രേലിയക്കായി മര്നസ് ലാബുഷെയ്ന് അര്ധ സെഞ്ച്വറിയടിച്ചിരുന്നു.
രാത്രി ഭക്ഷണത്തിനു പിരിയും മുന്പ് ഓസീസിന് നാലാം വിക്കറ്റ് നഷ്ടമായി. ലാബുഷെയ്നാണ് പുറത്തായത്. താരം 64 റണ്സുമായി മടങ്ങി. രാത്രി ഭക്ഷണത്തിനു പിന്നാലെ ഓസീസിന് അഞ്ചാം വിക്കറ്റും നഷ്ടമായി. മിച്ചല് മാര്ഷ് 9 റണ്സുമായി പുറത്തായി. ഉസ്മാന് ഖവാജ (13), മക്സ്വീനി (39) സ്റ്റീവ് സ്മിത്ത് (2) എന്നിവരാണ് ഔട്ടായ മറ്റുള്ളവര്.
ഇന്ത്യക്കായി ജസ്പ്രിത് ബുംറ 3 വിക്കറ്റുകള് വീഴ്ത്തി. നിതീഷ് കുമാര് റെഡ്ഡി, ആര് അശ്വിന് എന്നിവര് ഓരോ വിക്കറ്റെടുത്തു.
ടോസ് നേടി ബാറ്റിങിനു ഇറങ്ങിയ ഇന്ത്യയെ മിച്ചല് സ്റ്റാര്ക്കിന്റെ ബൗളിങാണ് വെട്ടിലാക്കിയത്. 180 റണ്സിന് എല്ലാവരും പുറത്തായി. താരം 6 വിക്കറ്റുകള് വീഴ്ത്തി പിങ്ക് പന്തിലെ തന്റെ സ്വാധീനം ഒരിക്കല് കൂടി വെളിവാക്കി. 54 പന്തുകള് നേരിട്ട് മൂന്ന് വീതം സിക്സും ഫോറും സഹിതം 42 റണ്സെടുത്ത നിതീഷ് കുമാര് റെഡ്ഡിയാണ് ഇന്ത്യന് നിരയിലെ ടോപ് സ്കോറര്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates