സതാംപ്ടൺ: ലോക ടെസ്റ്റ് ചാമ്പ്യൻഷിപ്പ് ഫൈനലിൽ വിരാട് കോഹ് ലിയുടെ വിക്കറ്റ് ജാമിസൺ വീഴ്ത്തിയതോടെ നിയന്ത്രണം നഷ്ടപ്പെട്ട് നിൽക്കുകയാണ് റോയൽ ചലഞ്ചേഴ്സ് ബാം​ഗ്ലൂർ ആരാധകർ. ജാമിസണിനെ ആർസിബിയിൽ നിന്ന് പുറത്താക്കണം എന്നാണ് ആരാധകരുടെ ആവശ്യം. 

ഐപിഎല്ലിന്റെ സമയം ഡ്യൂക്ക് ബോളിൽ പന്തെറിയാനുള്ള കോഹ് ലിയുടെ ആവശ്യം ജാമിസൺ നിഷേധിച്ചിരുന്നു. ലോക ടെസ്റ്റ് ചാമ്പ്യൻഷിപ്പിന്റെ ആദ്യ ഇന്നിങ്സിൽ ജാമിസൺ 5 വിക്കറ്റ് നേട്ടത്തിലേക്ക് എത്തിയപ്പോൾ അതിൽ ഒരു ഇര ഇന്ത്യൻ ക്യാപ്റ്റനായിരുന്നു. ഇതോടെ ജാമിസണിന് എതിരെ തിരിഞ്ഞ ആരാധകർ വലിയ അധിക്ഷേപമാണ് നടത്തുന്നത്. 

15 കോടി രൂപയ്ക്കാണ് പതിനാലാം സീസണിന് മുൻപായി ജാമിസണിനെ ആർസിബി സ്വന്തമാക്കിയത്. ജാമിസണുമായുള്ള കരാർ ആർസിബി റദ്ദാക്കണം, ജാമിസണിനെ ടീമിൽ നിന്ന് പുറത്താക്കണം, 15 കോടി വാങ്ങി പിന്നിൽ നിന്ന് കുത്തി എന്നെല്ലാമാണ് ആർസിബി ആരാധകർ ജാമിസണിന് നേരെ അധിക്ഷേപം ചൊരിഞ്ഞുകൊണ്ട് പറയുന്നത്.