ധരംശാല: ഇന്ത്യന്‍ ഓപ്പണിങ് ബാറ്റ്‌സ്മാന്‍ ഇഷാന്‍ കിഷനെ ആശുപത്രിയില്‍ പ്രവേശിപ്പിച്ചു. ശ്രീലങ്കയ്‌ക്കെതിരായ രണ്ടാം ട്വന്റി20യില്‍ ബാറ്റ് ചെയ്യവെ ഇഷാന് തലയില്‍ പന്ത് കൊണ്ട് പരിക്കേറ്റിരുന്നു. 

ഇഷാനെ സിടി സ്‌കാനിന് വിധേയമാക്കിയതായും നിരീക്ഷണത്തില്‍ കഴിയുകയാണെന്നും ദേശിയ മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇതോടെ പരമ്പരയിലെ അവസാന ട്വന്റി20യില്‍ ഇഷാന്‍ കളിക്കില്ല. ശ്രീലങ്കന്‍ പേസര്‍ ലഹിരു കുമാരയുടെ 146കിമീ വേഗതയിലെ ബൗണ്‍സറിലാണ് ഇഷാന് പരിക്കേറ്റത്. 

ഇന്ത്യന്‍ ഇന്നിങ്‌സിന്റെ നാലാം ഓവറിലായിരുന്നു സംഭവം. പുള്‍ ഷോട്ട് കളിക്കാന്‍ ഇഷാന്‍ ശ്രമിക്കവെ പന്ത് ഹെല്‍മറ്റില്‍ കൊണ്ടു. എങ്കിലും ഇഷാന്‍ കളി തുടര്‍ന്നു. എന്നാല്‍ അധിക സമയം ക്രീസില്‍ തുടരാന്‍ ഇഷാന് കഴിഞ്ഞില്ല. ആദ്യ ട്വന്റി20യില്‍ തകര്‍പ്പന്‍ അര്‍ധ ശതകത്തോടെയാണ് ഇഷാന്‍ തിളങ്ങിയത്. എന്നാല്‍ രണ്ടാമത്തേതിലേക്ക് എത്തിയപ്പോള്‍ 16 റണ്‍സ് എടുത്ത് യുവതാരം മടങ്ങി.

 ശ്രീലങ്കന്‍ താരം ദിനേശ് ചാന്ദിമലിനും രണ്ടാം ട്വന്റി20യില്‍ ഫീല്‍ഡ് ചെയ്യവെ പരിക്കേറ്റിരുന്നു.വിരലിനാണ് പരിക്ക്. ദിനേശ് ചാന്ദിമലിനേയും ആശുപത്രിയില്‍ പ്രവേശിപ്പിച്ചു.