ടോക്യോ: ഒളിംപിക്‌സ് മത്സരങ്ങള്‍ക്കിടെ, ചിരി പടര്‍ത്തുന്നതും കൗതുകം ഉണര്‍ത്തുന്നതുമായ നിരവധി വൈറല്‍ വീഡിയോകള്‍ ഇതിനോടകം പുറത്തുവന്നിട്ടുണ്ട്. അത്തരത്തിലുള്ള ഒരു വീഡിയോയാണ് ഇപ്പോള്‍ സോഷ്യല്‍മീഡിയയുടെ ശ്രദ്ധ ആകര്‍ഷിച്ചത്. 

അര്‍ജന്റീനയും സ്‌പെയിനും തമ്മിലുള്ള വനിതാ ഹോക്കി മത്സരത്തിനിടെ, അര്‍ജന്റീനിയന്‍ ടിവി ചാനല്‍ ക്യാമറമാന്‍ പകര്‍ത്തിയ ദൃശ്യങ്ങളാണ് ചിരി പടര്‍ത്തിയത്. മത്സരം മുറുകുന്നതിനിടെ, കളിക്കളത്തില്‍ ഇഴഞ്ഞുനീങ്ങിയ പാറ്റയുടെ നേര്‍ക്ക്  ക്യാമറ ചലിപ്പിച്ചു. ക്യാമറമാന്‍ പകര്‍ത്തിയ ദൃശ്യങ്ങളാണ് സമൂഹമാധ്യമങ്ങളില്‍ വ്യാപകമായി പ്രചരിക്കുന്നത്. 

സെക്കന്‍ഡുകളോളം ക്യാമറ ചലിപ്പിച്ച് പാറ്റയുടെ നീക്കം സസൂക്ഷ്മമായി നിരീക്ഷിക്കുന്നതായാണ് വീഡിയോ കണ്ടാല്‍ തോന്നുക. പിന്നീട് പാറ്റയുടെ സ്വകാര്യത തടസ്സപ്പെടുത്തരുത് എന്ന് കരുതി ക്യാമറ പിന്നീട് കളിക്കളത്തിലേക്ക് തന്നെ തിരിക്കുന്ന ഭാഗത്താണ് വീഡിയോ അവസാനിക്കുന്നത്.