കേപ്ടൗണ്‍: ഇംഗ്ലണ്ടിന് എതിരായ സൗത്ത് ആഫ്രിക്കയുടെ ആദ്യ ഏകദിനം ഉപേക്ഷിച്ചു. രണ്ട് ടീമുകളും തങ്ങുന്ന ഹോട്ടലിലെ രണ്ട് സ്റ്റാഫിന് കോവിഡ് പോസിറ്റീവായതോടെയാണ് കളി ഉപേക്ഷിച്ചത്. 

ഡിസംബര്‍ നാലിനാണ് ആദ്യ ഏകദിനം കളിക്കേണ്ടിയിരുന്നത്. രണ്ട് സൗത്ത് ആഫ്രിക്കന്‍ കളിക്കാര്‍ക്ക് കോവിഡ് പോസിറ്റീവായതോടെ ഡിസംബര്‍ 4ലെ കളി മാറ്റിവെച്ചു. ഡിസംബര്‍ ആറിന് ആദ്യ ഏകദിനം നടത്താന്‍ നിശ്ചയിച്ചു. എന്നാല്‍ ഹോട്ടല്‍ സ്റ്റാഫിലെ രണ്ട് പേര്‍ക്ക് കോവിഡ് പോസിറ്റീവായതോടെ മുഴുവന്‍ ടീം അംഗങ്ങളേയും വീണ്ടും കോവിഡ് പരിശോധനക്ക് വിധേയമാക്കി. 

ശനിയാഴ്ച വൈകുന്നേരമാണ് ഇംഗ്ലണ്ട് താരങ്ങള്‍ വീണ്ടും കോവിഡ് പരിശോധനക്ക് വിധേയമായത്. നിലവിലെ സാഹചര്യത്തില്‍ ഏകദിന പരമ്പര ഉപേക്ഷിക്കേണ്ട സാഹചര്യത്തിലേക്കാണ് കാര്യങ്ങള്‍ നീങ്ങുന്നത്. മൂന്ന് ഏകദിനങ്ങളുടെ ടി20 പരമ്പര സൗത്ത് ആഫ്രിക്കയില്‍ ഇംഗ്ലണ്ട് കളിച്ചിരുന്നു. 3-0ന് പരമ്പര ഇംഗ്ലണ്ട് തൂത്തുവാരുകയും ചെയ്തു.