ന്യൂഡൽഹി: ​ഗ്ലാസ്​ഗോയിൽ ഈ മാസം 23 മുതൽ ആരംഭിക്കുന്ന കോമൺവെൽത്ത് ​ഗെയിംസ് ഉദ്ഘാടന ചടങ്ങിൽ ഒളിംപിക് മെഡൽ ജേതാക്കളായ ​ഭാരോദ്വഹന താരം മീരാഭായ് ചാനുവും ബോക്സിങ് താരം ലവ്‍ലിന ബോർ​ഗോഹെയ്നും ഇന്ത്യ പതാകയും ബാറ്റണും ഏന്തും. ഇന്ത്യൻ ഒളിംപിക് അസോസിയേഷൻ ആണ് രാജ്യത്തിന്റെ അഭിമാന വനിതാ താരങ്ങളായ ഇരുവരേയും ഈ ദൗത്യത്തിനായി നിയോ​ഗിച്ചത്. ഈ മാസം 23നാണ് ഉദ്ഘാടന ചടങ്ങ്. 124 അം​​ഗങ്ങളുള്ള താരങ്ങളുടെ സംഘത്തെ ഇരുവരും മുന്നിൽ നിന്നു നയിക്കും. ജൂലൈ 23 മുതൽ ഓ​ഗസ്റ്റ് 2 വരെയാണ് കോമൺവെൽത്ത് ​ഗെയിംസ്.

ഇത്തവണ വിപുലമായ ഉദ്ഘാടന പരിപാടികൾ ഇല്ല. ഓവോ ഹൈഡ്രോ സ്റ്റേഡിയത്തിലാണ് കോമൺവെൽത്ത് ​ഗെയിംസിന്റെ ഉദ്ഘാടന ചടങ്ങുകൾ. ഇന്ത്യൻ കായിക രം​ഗത്തിനു ഇരു താരങ്ങളും നൽകിയ അവിസ്മരണീയ സംഭാവനകൾക്കുള്ള അം​ഗീകാരമാണ് ബഹുമതിയെന്നു ഐഒഎ അധ്യക്ഷ പിടി ഉഷ വ്യക്തമാക്കി.

ഉ​ദ്ഘാടന ചടങ്ങിലെ പതാക, ബാറ്റൺ ഏന്തുന്നവർ എന്നതിലുപരി ​ഗെയിംസിൽ ഇന്ത്യ ഏറ്റവും കൂടുതൽ മെഡൽ പ്രതീക്ഷകളോടെ നോക്കുന്ന താരങ്ങളാണ് ഇരുവരും. 2021ലെ ടോക്യോ ഒളിംപിക്സിൽ വനിതകളുടെ 49 കിലോ വിഭാ​ഗത്തിൽ വെള്ളി നേടിയ താരമാണ് മീരഭായ്. 2022ലെ കോമൺവെൽത്ത് ​ഗെയിംസിൽ സ്വർണവും ലോക ചാംപ്യൻഷിപ്പുകളിൽ ഒന്നിലേറെ മെഡലുകളും താരം സ്വന്തമാക്കിയിട്ടുണ്ട്.

ലവ്‍ലിനയും ടോക്യോ ഒളിംപിക്സിൽ വനിതാ ബോക്സിങിൽ വെങ്കലം നേടി ചരിത്രമെഴുതിയ താരമാണ്. 2023ലെ വനിതാ ലോക ചാംപ്യൻ കൂടിയാണ്. 2023ലെ ഏഷ്യൻ ​ഗെയിസ് വെള്ളി നേട്ടവും ലവ്‍ലിനയ്ക്കുണ്ട്.

​ഗെയിംസിൽ 124 ഇന്ത്യൻ താരങ്ങളാണ് മത്സരിക്കാൻ ഇറങ്ങുന്നത്. അത്‍ലറ്റിക്സ്, ബോക്സിങ്, വെയ്റ്റ്ലിഫ്റ്റിങ്, സൈക്ലിങ്, ജിംനാസ്റ്റിക്സ്, ലോൺ ബോൾസ്, നീന്തൽ ഉൾപ്പെടെ 10 ഇനങ്ങളിലാണ് ഇന്ത്യ മത്സരിക്കുന്നത്.