ലണ്ടൻ: ഫുട്ബോൾ ലോകം ഏറെ ആകാംഷയോടെ കാത്തിരിക്കുന്ന 2026 ജൂണിലെ ഫിഫ ലോകകപ്പിനുള്ള 26 അംഗ ശക്തമായ ഇംഗ്ലണ്ട് ടീമിനെ മുഖ്യപരിശീലകൻ തോമസ് ടുഹൽ ഔദ്യോഗികമായി പ്രഖ്യാപിച്ചു. പ്രമുഖ സൂപ്പർ താരങ്ങളെ പലരെയും പൂർണ്ണമായി തഴഞ്ഞുകൊണ്ട് അതീവ നാടകീയവും കടുത്തതുമായ തീരുമാനങ്ങളാണ് പരിശീലകൻ എന്ന നിലയിലുള്ള തന്റെ ആദ്യ ലോകകപ്പ് സ്ക്വാഡ് പ്രഖ്യാപനത്തിലൂടെ ജർമ്മൻ തന്ത്രജ്ഞനായ ടുഹൽ കൈക്കൊണ്ടിരിക്കുന്നത്. മാഞ്ചസ്റ്റർ സിറ്റിയുടെ സൂപ്പർ താരം ഫിൽ ഫോഡൻ, ചെൽസിയുടെ യുവ വിസ്മയം കോൾ പാമർ, റയൽ മാഡ്രിഡിന്റെ വിശ്വസ്തനായ റൈറ്റ് ബാക്ക് ട്രെന്റ് അലക്സാണ്ടർ അർനോൾഡ് എന്നിവരടങ്ങുന്ന വമ്പൻ നിരയെയാണ് ടീമിൽ നിന്നും പൂർണ്ണമായി ഒഴിവാക്കിയത്. .

വരുന്ന ജൂൺ 17-ന് ഡള്ളാസിൽ വെച്ച് ക്രൊയേഷ്യക്കെതിരെ പോരാട്ടത്തോടെയാണ് ഇംഗ്ലണ്ട് തങ്ങളുടെ ലോകകപ്പ് കാമ്പെയ്ന് തുടക്കം കുറിക്കുന്നത്. ഗ്രൂപ്പ് എൽ ലിൽ ഉൾപ്പെട്ടിരിക്കുന്ന ഇംഗ്ലണ്ട് പിന്നീട് ജൂൺ 23-ന് ആഫ്രിക്കൻ കരുത്തരായ ഘാനയെയും, ജൂൺ 27-ന് പനാമയെയും നേരിടും. ഫോഡൻ, പാമർ, ട്രെന്റ് എന്നിവർക്ക് പുറമെ മുൻനിര പ്രതിരോധ താരം ഹാരി മഗ്വയർ, മോർഗൻ ഗിബ്സ് വൈറ്റ്, ലൂക്ക് ഷാ, ആദം വാർട്ടൺ, ജെയിംസ് ഗാർനർ എന്നിവർക്കും ഇത്തവണ ടീമിലിടം പിടിക്കാൻ സാധിച്ചില്ല. ആഭ്യന്തര ലീഗുകളിൽ മാഞ്ചസ്റ്റർ സിറ്റിക്കും ചെൽസിക്കും വേണ്ടി മോശം സീസണിലൂടെ കടന്നുപോയതാണ് ഫോഡനും പാമർക്കും തിരിച്ചടിയായത്. കഴിഞ്ഞ കുറച്ചുകാലമായി ദേശീയ ടീമിൽ പതിവുകാരനല്ലാതിരുന്ന ട്രെന്റിനെ വേണ്ടെന്ന് വെക്കാൻ ടുഹൽ തീരുമാനമെടുക്കുകയായിരുന്നു. തന്നെ ടീമിൽ ഉൾപ്പെടുത്താത്ത വാർത്ത മുൻകൂട്ടിയറിഞ്ഞ് മാഞ്ചസ്റ്റർ യുണൈറ്റഡ് താരം ഹാരി മഗ്വയർ സോഷ്യൽ മീഡിയയിൽ ഞെട്ടലും കടുത്ത നിരാശയും രേഖപ്പെടുത്തി രംഗത്തെത്തിയിട്ടുണ്ട്.

ടോണിക്കും വാട്കിൻസിനും അപ്രതീക്ഷിത വിളി; മധ്യനിരയിൽ യുവരക്തം

ടീം പ്രഖ്യാപനത്തിലെ ഏറ്റവും വലിയ അത്ഭുതം അൽ അഹ്‌ലി സ്ട്രൈക്കർ ഐവൻ ടോണിയുടെ അപ്രതീക്ഷിത കടന്നുവരവാണ്. ടുഹൽ പരിശീലകനായി ചുമതലയേറ്റ ശേഷം വെറും രണ്ട് മിനിറ്റ് മാത്രം ഇംഗ്ലണ്ടിനായി കളിച്ച ടോണിക്ക്, സൗദി അറേബ്യൻ ലീഗിൽ നടത്തിയ മിന്നും ഗോൾവേട്ടയാണ് ടീമിലേക്ക് വീണ്ടും വഴിതുറന്നത്. ആസ്റ്റൺ വില്ലയ്ക്ക് വേണ്ടി സീസണിന്റെ അവസാന ഘട്ടത്തിൽ മിന്നും ഫോമിലായിരുന്ന ഒല്ലി വാട്കിൻസും ടീമിലേക്ക് തിരിച്ചെത്തിയിട്ടുണ്ട്. ക്യാപ്റ്റൻ ഹാരി കെയ്‌നിന് തൊട്ടുപിന്നിൽ ബാക്കപ്പ് സ്ട്രൈക്കർ സ്ഥാനത്തിനായി ടോണിയും വാട്കിൻസും തമ്മിൽ ശക്തമായ മത്സരമായിരിക്കും നടക്കുക.

1966-ന് ശേഷമുള്ള തങ്ങളുടെ കന്നി ലോകകപ്പ് കിരീടം ലക്ഷ്യമിട്ടിറങ്ങുന്ന ഇംഗ്ലണ്ടിന്റെ ആക്രമണ നിരയെ ഹാരി കെയ്ൻ തന്നെ മുന്നിൽ നിന്ന് നയിക്കും. ഡിക്ലാൻ റൈസ്, കോബി മൈനൂ, മോർഗൻ റോഗേഴ്സ്, എലിയറ്റ് ആൻഡേഴ്സൺ എന്നിവരടങ്ങുന്ന യുവത്വവും വേഗതയുമുള്ള മധ്യനിരയിലാണ് ടുഹൽ കൂടുതൽ വിശ്വാസമർപ്പിച്ചിരിക്കുന്നത്

ടീമിൽ ഉൾപ്പെടുത്തിയ ചില താരങ്ങളുടെ കായിക്ഷമതകായിക ലോകത്ത് ചെറിയ ആശങ്കകൾക്ക് കാരണമായിട്ടുണ്ട്. തുടയിലെ പരിക്ക് കാരണം കഴിഞ്ഞ ഒരു മാസത്തോളമായി കളിക്കളത്തിന് പുറത്തിരിക്കുന്ന ടിനോ ലിവ്‌റാമെന്റോയെയും, താടിയെല്ലിന് പരിക്കേറ്റതായി റിപ്പോർട്ടുകളുണ്ടായിരുന്ന ഡിജെഡ് സ്പെൻസിനെയും ടുഹൽ ടീമിൽ നിലനിർത്തിയിട്ടുണ്ട്. ജോർദാൻ പിക്ക്ഫോർഡ് ഒന്നാം നമ്പർ ഗോൾകീപ്പറായി തുടരുന്ന ടീമിന്റെ പ്രതിരോധ കോട്ട കാക്കാൻ ജോൺ സ്റ്റോൺസ്, റീസ് ജെയിംസ്, മാർക് ഗുവേഹി തുടങ്ങിയ പ്രമുഖരാണ് അണിനിരക്കുന്നത്. ബുക്കായോ സാക്ക, മാർക്കസ് റാഷ്‌ഫോർഡ്, ആന്റണി ഗോർഡൻ എന്നിവരുടെ വേഗതയും വിംഗുകളിൽ ഇംഗ്ലണ്ടിന് കരുത്താകും.

ഇംഗ്ലണ്ട് ലോകകപ്പ് ടീം (England Squad)

ഗോൾകീപ്പർമാർ: ജോർദാൻ പിക്ക്ഫോർഡ്, ഡീൻ ഹെൻഡേഴ്സൺ, ജെയിംസ് ട്രാഫോർഡ്.

പ്രതിരോധ നിര: റീസ് ജെയിംസ്, എസ്രി കോൻസ, ജാരെൽ ക്വാൻസ, ജോൺ സ്റ്റോൺസ്, മാർക് ഗുവേഹി, ഡാൻ ബേൺ, നിക്കോ ഒറെയ്‌ലി, ഡിജെഡ് സ്പെൻസ്, ടിനോ ലിവ്‌റാമെന്റോ.

മധ്യനിര: ഡിക്ലാൻ റൈസ്, എലിയറ്റ് ആൻഡേഴ്സൺ, കോബി മൈനൂ, ജോർദാൻ ഹെൻഡേഴ്സൺ, മോർഗൻ റോഗേഴ്സ്, ജൂഡ് ബെല്ലിങ്ഹാം, എബെറെച്ചി എസെ.

ആക്രമണ നിര: ഹാരി കെയ്ൻ, ഐവൻ ടോണി, ഒല്ലി വാട്കിൻസി, ബുക്കായോ സാക്ക, മാർക്കസ് റാഷ്‌ഫോർഡ്, ആന്റണി ഗോർഡൻ, നോനി മഡുവെകെ.