ദുബായ്: 2021ലെ മികച്ച ടെസ്റ്റ് ക്രിക്കറ്റ് താരത്തിനുള്ള ഐസിസി പുരസ്‌കാരം ഇംഗ്ലണ്ട് നായകന്‍ ജോ റൂട്ടിന്. ആഷസിലെ വമ്പന്‍ തോല്‍വിയടക്കം ഇംഗ്ലണ്ടിന് 2021 നിരാശയുടേതായിരുന്നെങ്കില്‍ റൂട്ടിന് അങ്ങനെയായിരുന്നില്ല. നായകന്‍ കത്തുന്ന ഫോമിലായിരുന്നു. കലണ്ടര്‍ വര്‍ഷത്തില്‍ റൂട്ട് അടിച്ചെടുത്തത് 1,708 റണ്‍സ്. പിന്നാലെയാണ് ഐസിസി ടെസ്റ്റ് ക്രിക്കറ്റ് ഓഫ് ദി ഇയര്‍ പുരസ്‌കാരം. 

15 ടെസ്റ്റുകളില്‍ നിന്നാണ് 2021ല്‍ റൂട്ട് 1,708 റണ്‍സ് അടിച്ചെടുത്തത്. ഒരു കലണ്ടര്‍ വര്‍ഷം ടെസ്റ്റില്‍ ഇത്രയും റണ്‍സെടുക്കുന്ന മൂന്നാമത്തെ താരമെന്ന നേട്ടവും റൂട്ട് സ്വന്തമാക്കിയിരുന്നു. പാക് ഇതിഹാസം മുഹമ്മദ് യൂസുഫ്, വിന്‍ഡീസ് ഇതിഹാസം വിവിയന്‍ റിച്ചാര്‍ഡ്‌സ് എന്നിവരാണ് റൂട്ടിന് മുന്‍പ് നേട്ടത്തിലെത്തിയ താരങ്ങള്‍. 

ഇന്ത്യയ്‌ക്കെതിരെ തുടര്‍ച്ചയായ മൂന്ന് ടെസ്റ്റുകളിലെ സെഞ്ച്വറി ഉള്‍പ്പെടെ നാല് സെഞ്ച്വറികളും രണ്ട് ഇരട്ട സെഞ്ച്വറികളും അദ്ദേഹം 2021ല്‍ നേടി. ന്യൂസിലന്‍ഡ് ബൗളര്‍ കെയ്ല്‍ ജാമിസണ്‍, ശ്രീലങ്കന്‍ ഓപ്പണര്‍ ദിമുത് കരുണരത്‌നെ, ഇന്ത്യന്‍ സ്പിന്നര്‍ രവിചന്ദ്രന്‍ അശ്വിന്‍ എന്നിവരായിരുന്നു അവാര്‍ഡിനായുള്ള മറ്റു നോമിനികള്‍. ഇവരെ പിന്തള്ളിയാണ് ഇംഗ്ലീഷ് നായകന്റെ നേട്ടം.