ലണ്ടൻ: ഐപിഎൽ പുനരാരംഭിച്ചാലും ഇം​ഗ്ലണ്ട് താരങ്ങളെ വിടില്ലെന്ന നിലപാട് വീണ്ടും ആവർത്തിച്ച് ഇം​ഗ്ലണ്ട് ക്രിക്കറ്റ് ബോർഡ്. ഐപിഎല്ലിന് വേണ്ടി ഇന്ത്യ-ഇം​ഗ്ലണ്ട് ടെസ്റ്റ് പരമ്പരയിൽ മാറ്റം വരുത്തുന്നതിനെ കുറിച്ച് ആലോചിക്കുന്നില്ലെന്നും ഇം​ഗ്ലണ്ട് ക്രിക്കറ്റ് ബോർഡ് മാനേജിങ് ഡയറക്ടർ ആഷ്ലി ജൈൽസ് വ്യക്തമാക്കി. 

സെപ്തംബർ മുതൽ ഒക്ടോബർ വരെയുള്ള വിൻഡോയാണ് ഐപിഎല്ലിന് വേണ്ടി ബിസിസിഐ ലക്ഷ്യം വെക്കുന്നത്. എന്നാൽ ഈ സമയം ഇം​ഗ്ലണ്ടിന് ബം​ഗ്ലാദേശിനും പാകിസ്ഥാനുമെതിരായ പരമ്പരയുണ്ട്. ഇന്ത്യക്കെതിരായ അവസാന ടെസ്റ്റ് സെപ്തംബറിലാണ്. ഇതിന് ശേഷം ബം​ഗ്ലാദേശ് പര്യടനത്തിനായി ഇം​ഗ്ലണ്ട് ടീം പുറപ്പെടുമെന്നും ആഷ്ലി ജൈൽസ് പറഞ്ഞു. 

ബം​ഗ്ലാദേശ് പര്യടനത്തിന് ശേഷം പാകിസ്ഥാനിൽ ഇം​ഗ്ലണ്ട് കളിക്കും. ഇത് കഴിഞ്ഞാൽ ടി20 ലോകകപ്പിന് മുൻപായി ഇം​ഗ്ലണ്ടിന് മറ്റ് ടൂർണമെന്റുകൾ ഇല്ല. ഇം​ഗ്ലണ്ട്, ബം​ഗ്ലാദേശ് പരമ്പരകളിൽ പല താരങ്ങൾക്കും വിശ്രമം നൽകിയേക്കും. എന്നാൽ അതിന് അർഥം മറ്റ് ലീ​ഗുകളിൽ പോയി കളിക്കാം എന്നല്ല. ടി20 ലോകകപ്പിനും ആഷസിനുമായി കളിക്കാരെ സജ്ജമാക്കുകയാണ് ലക്ഷ്യം എന്നും ഇം​ഗ്ലണ്ട് ക്രിക്കറ്റ് ബോർഡ് വ്യക്തമാക്കുന്നു. 

ഇം​ഗ്ലണ്ട് താരങ്ങൾ എത്തിയില്ലെങ്കിൽ ടീമുകൾക്ക് അത് വലിയ വെല്ലുവിളി ഉയർത്തും. ജോഫ്ര ആർച്ചർ, ബെൻ സ്റ്റോക്ക്സ് എന്നിവരെ നഷ്ടപ്പെട്ടപ്പോൾ പ്രതിസന്ധിയിലാണ് രാജസ്ഥാൻ റോയൽസിന് ബട്ട്ലറെ കൂടി നഷ്ടപ്പെട്ടാൽ കാര്യങ്ങൾ കൂടുതൽ സങ്കീർണമാവും. കൊൽക്കത്ത നൈറ്റ്റൈഡേഴ്സിന് തങ്ങളുടെ നായകനെ തന്നെ നഷ്ടപ്പെടും.