ലണ്ടന്‍: ആഷസ് ടെസ്റ്റ് പരമ്പരയിലെ അവസാന പോരാട്ടത്തിനു ഇന്ന് തുടക്കം. ആദ്യ രണ്ട് മത്സരങ്ങളും വിജയിച്ച് പരമ്പരയില്‍ സുരക്ഷിതമായി നിന്ന ഓസ്‌ട്രേലിയയെ മൂന്നാം പോരാട്ടത്തില്‍ പരാജയപ്പെടുത്തി ഇംഗ്ലണ്ട് തിരിച്ചെത്തിയിരുന്നു. എന്നാല്‍ നാലാം ടെസ്റ്റില്‍ ആതിഥേയര്‍ വിജയത്തിലേക്ക് നീങ്ങവേ എത്തിയ മഴ അവരുടെ പ്രതീക്ഷകളെ തല്ലിക്കെടുത്തി. അതോടെ ഇന്ന് തുടങ്ങുന്ന പോരാട്ടം ഇംഗ്ലണ്ടിനു അതി നിര്‍ണായകം. 

പരമ്പര നഷ്ടപ്പെടില്ലെന്ന ആത്മവിശ്വാസത്തിലാണ് ഓസ്‌ട്രേലിയ. അഞ്ചാം പോരാട്ടം വിജയിച്ച് പരമ്പര ഒറ്റയ്ക്ക് 3-1നു നേടി ആഷസ് നിലനിര്‍ത്തുകയാണ് അവര്‍ മുന്നില്‍ കാണുന്നത്. ഇംഗ്ലണ്ടിനു വിജയം അനിവാര്യമാണ്. എങ്കില്‍ മാത്രമേ ഓസീസിനൊപ്പം ആഷസ് പങ്കിടാന്‍ സാധിക്കു. 

ഇന്ന് തുടങ്ങുന്ന പോരാട്ടം ബെന്‍ സ്‌റ്റോക്‌സിനു ഒരു അപൂര്‍വ നേട്ടത്തിനുള്ള അവസരം കൂടി ഒരുക്കുന്നു. മത്സരം വിജയിച്ചാല്‍ സ്റ്റോക്‌സ് ഇതിഹാസ താരം ഡോണ്‍ ബ്രാഡ്മാന്റെ നേട്ടത്തിനൊപ്പമെത്തും. 

ഇതുപോലൊരു ആഷസ് പരമ്പരയിലെ ആദ്യ രണ്ട് മത്സരങ്ങളും ഓസ്‌ട്രേലിയ പരാജയപ്പെട്ടു പരമ്പരയില്‍ 2-0ത്തിനു പിന്നിലായിരുന്നു. പിന്നീട് ബ്രാഡ്മാന്റെ മികവില്‍ ഓസീസ് പരമ്പരയിലേക്ക് ശക്തമായി തിരിച്ചെത്തി. 1936-37 കാലത്താണ് ഈ ഗംഭീര തിരിച്ചു വരവ് പോരാട്ടം അരങ്ങേറിയത്. സമാന സമ്മര്‍ദ്ദമാണ് നിലവില്‍ ഇംഗ്ലണ്ടിനുള്ളത്. 

ആദ്യ രണ്ട് പോരിലും വിജയിക്കാതെ പോയ ഇംഗ്ലണ്ടിന്റെ ബാസ്‌ബോള്‍ തന്ത്രം മൂന്നും നാലും ടെസ്റ്റുകളില്‍ വിജയിച്ചു. അതിന്റെ കരുത്തും ഇംഗ്ലണ്ടിനു ആവേശമായി നില്‍ക്കുന്നു. ബാറ്റിങ് നിരയും ബൗളിങ് നിരയില്‍ സന്തുലിതമായി നില്‍ക്കുന്നുണ്ട്. 

പരമ്പര പുരോഗമിക്കും തോറും ബാറ്റര്‍മാരും ബൗളര്‍മാരും പിന്നാക്കം പോകുന്നതാണ് ഓസീസിനെ കുഴപ്പിക്കുന്നത്. നാലാം ടെസ്റ്റില്‍ തോല്‍വിയുടെ വക്കിലായിരുന്നു അവര്‍. മഴയാണ് ഓസീസിനെ രക്ഷിച്ചെടുത്തത് എന്നു പറയാം.

ഇംഗ്ലണ്ട് നാലാം ടെസ്റ്റ് കളിച്ച ടീമിനെ തന്നെ നിലനിര്‍ത്തിയേക്കും. ഓസ്‌ട്രേലിയക്ക് പരിക്ക് ആശങ്കയണ്ടാക്കുന്നുണ്ട്. മിച്ചല്‍ മാര്‍ഷ്, മിച്ചല്‍ സ്റ്റാര്‍ക്ക് എന്നിവരെ പരിക്ക് അലട്ടുന്നുണ്ട്. എങ്കിലും ഇവരും കളിക്കുമെന്നാണ് പ്രതീക്ഷിക്കുന്നത്. ഓഫ് സ്പിന്നര്‍ ടോഡ് മര്‍ഫി അഞ്ചാം ടെസ്റ്റില്‍ ടീമില്‍ തിരിച്ചെത്തിയേക്കും.

ഈ വാര്‍ത്ത കൂടി വായിക്കൂ

സഞ്ജുവോ, ഇഷാനോ? ലക്ഷ്യം  ലോകകപ്പ് ടീം; ഇന്ത്യ- വിന്‍ഡീസ് ഏകദിന പരമ്പരയ്ക്ക് ഇന്ന് തുടക്കം

ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ