ആന്റിഗ്വ: അണ്ടര്‍ 19 ലോകകപ്പ് ക്രിക്കറ്റ് ഫൈനലില്‍ ഇംഗ്ലണ്ടിന്റെ രണ്ട് വിക്കറ്റുകള്‍ വീഴ്ത്തി മികച്ച തുടക്കമിട്ട് ഇന്ത്യ. ടോസ് നേടി ഇംഗ്ലണ്ട് ബാറ്റിങ് തിരഞ്ഞെടുക്കുകയായിരുന്നു. 

ഓപ്പണര്‍ ജേക്കബ് ബെഥേലിന്റെ വിക്കറ്റാണ് ഇംഗ്ലണ്ടിന് ആദ്യം നഷ്ടമായത്. പിന്നാലെ വണ്ടൗണായി ക്രീസിലെത്തിയ ടോം പ്രിസ്റ്റിനെ സംപൂജ്യനായി മടക്കിയാണ് ഇന്ത്യ ഇംഗ്ലണ്ടിനെ ഞെട്ടിച്ചത്. 

ജേക്കബ് ബെഥേല്‍ രണ്ട് റണ്‍സ് മാത്രമാണ് നേടിയത്. രണ്ടാം ഓവറിന്റെ അഞ്ചാം പന്തില്‍ ഇന്ത്യയുടെ രവി കുമാര്‍ ഇംഗ്ലീഷ് ഓപ്പണറെ വിക്കറ്റിന് മുന്നില്‍ കുടുക്കുകയായിരുന്നു. പിന്നാലെ തന്റെ അടുത്ത ഓവറില്‍ ടോം പ്രിസ്റ്റിനെയും താരം മടക്കി. പ്രിസ്റ്റിനെ രവി കുമാര്‍ ക്ലീന്‍ ബൗള്‍ഡാക്കി.

നിലവില്‍ ഇംഗ്ലണ്ട് രണ്ട്  വിക്കറ്റ് നഷ്ടത്തില്‍ 21 റണ്‍സെന്ന നിലയിലാണ്. 18 റണ്‍സുമായി ഓപ്പണര്‍ ജോര്‍ജ് തോമസും ഒരു റണ്ണുമായി ക്യാപ്റ്റന്‍ ജെയിംസ് റ്യുയുമാണ് ക്രീസില്‍.