ലണ്ടന്‍: ഇംഗ്ലീഷ് പ്രീമിയര്‍ ലീഗ് ഫുട്‌ബോളില്‍ ജയം സ്വന്തമാക്കി മാഞ്ചസ്റ്റര്‍ യുനൈറ്റഡ്, ടോട്ടനം ഹോട്‌സ്പര്‍, ആസ്റ്റന്‍ വില്ല ടീമുകള്‍. എവര്‍ട്ടന്‍, ബ്രൈറ്റന്‍ ടീമുകളും ജയിച്ചു കയറി.
മാഞ്ചസ്റ്റര്‍ യുനൈറ്റഡ് ബ്രെന്‍ഡ്‌ഫോര്‍ഡിനെ 2-1നു വീഴ്ത്തിയാണ് സ്വന്തം തട്ടകമായ ഓള്‍ഡ്ട്രഫോര്‍ഡില്‍ വിജയം പിടിച്ചത്. ആദ്യ പകുതിയുടെ ഇഞ്ച്വറി സമയത്ത് ബ്രെന്‍ഡ്‌ഫോര്‍ഡ് മുന്നിലെത്തിയിരുന്നു.
രണ്ടാം പകുതിയിലാണ് മാഞ്ചസ്റ്റര്‍ തിരിച്ചു വന്നത്. 47ാം മിനിറ്റില്‍ അലസാന്ദ്രോ ഗെര്‍നാചോ, 62ാം മിനിറ്റില്‍ റാസ്മസ് ഹോജ്‌ലുന്‍ഡ് എന്നിവരാണ് ടീമിനു ജയം സമ്മാനിച്ച ഗോളുകള്‍ വലയിലാക്കിയത്.
ഒരു ഗോളിനു പിന്നില്‍ നിന്ന ശേഷം 4 ഗോളുകള്‍ മടക്കി ടോട്ടനം സ്വന്തം തട്ടകത്തില്‍ വെസ്റ്റ്ഹാം യുനൈറ്റഡിനെ തകര്‍ത്തു. 18ാം മിനിറ്റില്‍ വെസ്റ്റ് ഹാം മുന്നിലെത്തി. 36ാം മിനിറ്റില്‍ കുലുസേവ്‌സ്‌കി, 52ല്‍ ബിസ്സൗമ, 55ല്‍ അരിയോളയുടെ സെല്‍ഫ് ഗോള്‍, 60ാം മിനിറ്റില്‍ സന്‍ ഹ്യുങ് മിന്‍ നാലാം ഗോളും നേടി ജയമുറപ്പിച്ചു.
ബ്രൈറ്റന്‍ 1-0ത്തിനു ന്യൂകാസില്‍ യുനൈറ്റഡിനെ വീഴ്ത്തി. എവര്‍ട്ടന്‍ ഇപ്‌സ്‌വിച് ടൗണിനെ 2-0ത്തിനു പരാജയപ്പെടുത്തി. ലെയ്സ്റ്റര്‍ സിറ്റി 3-2നു സതാംപ്ടനെ വീഴ്ത്തി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates