ലിസ്ബൻ: ഈ ലോകകപ്പിൽ കിരീട പ്രതീക്ഷയുമായി എത്തിയ സംഘമായിരുന്നു പോർച്ചു​ഗലിന്റേത്. ആരാധകർ കിരീടം നേടുമെന്നു ഉറപ്പിച്ച സംഘം പക്ഷേ പ്രീ ക്വാർട്ടറിൽ സ്പെയിനിനോടു പരാജയപ്പെട്ട് പുറത്താകുകയായിരുന്നു. ഇപ്പോൾ ലോകകപ്പ് തോൽവിയിൽ മൗനം വെടിഞ്ഞ് രം​ഗത്തെത്തിയിരിക്കുകയാണ് പോർച്ചുഗലിന്റെയും മാഞ്ചസ്റ്റർ യുനൈറ്റഡിന്റെയും സൂപ്പർ താരം ബ്രൂണോ ഫെർണാണ്ടസ്. തങ്ങളുടെ ടീം ലോകകപ്പിൽ നിന്ന് പുറത്തായതിലുള്ള കടുത്ത നിരാശയും സങ്കടവും അ​ദ്ദേഹം പരസ്യമായി പങ്കുവെച്ചു. ടീമിലെ കളിക്കാരുടെ മികച്ച ഗുണനിലവാരവും അവർ തമ്മിലുള്ള ശക്തമായ കെട്ടുറപ്പും കാരണം ഇത്തവണ വലിയ പ്രതീക്ഷകളുണ്ടായിരുന്നുവെന്ന് അദ്ദേഹം സമ്മതിച്ചു. കടുത്ത നിരാശ സമ്മാനിച്ച ഫലം ആയിരുന്നിട്ടും, ടൂർണമെന്റിലുടനീളം മികച്ച പിന്തുണയും വിശ്വാസവും അർപ്പിച്ച സഹതാരങ്ങൾക്കും കോച്ചിങ് സ്റ്റാഫിനും ആരാധകർക്കും മധ്യനിര താരം നന്ദി അറിയിച്ചു.

'സങ്കടവും നിരാശയും മോഹഭംഗവും തോന്നുന്നു. ഈ കളിക്കാരുടെ കൂട്ടം എന്റെ പ്രതീക്ഷകളെ ഏറെ ഉയർത്തിയിരുന്നു. അത് അവരുടെ കളിയിലെ മികവ് കൊണ്ട് മാത്രമല്ല, ഈ വർഷങ്ങളിൽ ഞങ്ങൾ കെട്ടിപ്പടുത്ത അവിശ്വസനീയമായ ഒത്തൊരുമ കൊണ്ടുകൂടിയാണ്. ലോകകപ്പിലുടനീളം ഓരോ ദിവസവും ഞങ്ങളെ ഒപ്പം നിന്ന് സഹായിച്ച എല്ലാ കളിക്കാർക്കും ടെക്നിക്കൽ ടീമിനും സ്റ്റാഫുകൾക്കും നന്ദി. ഒപ്പം എല്ലാ പോർച്ചുഗീസ് ജനതയോടും ഞങ്ങളെ പിന്തുണച്ചതിനും വിശ്വസിച്ചതിനും ഹൃദയം നിറഞ്ഞ നന്ദി അറിയിക്കുന്നു'- ബ്രൂണോ തന്റെ എക്സ് പോസ്റ്റിൽ കുറിച്ചു.

ഇത്തവണ ലോകകപ്പ് കിരീടം ഉയർത്താൻ ഏറ്റവും കൂടുതൽ സാധ്യത കൽപ്പിക്കപ്പെട്ടിരുന്ന ടീമുകളിൽ ഒന്നായിരുന്നിട്ടും പ്രീ ക്വാർട്ടർ ഘട്ടത്തിൽ തന്നെ പോർച്ചുഗലിന്റെ ലോകകപ്പ് പ്രയാണം ഒരിക്കൽ കൂടി അവസാനിക്കുകയായിരുന്നു. ബ്രൂണോ ഫെർണാണ്ടസ്, ലമീൻ യമാൽ, മികേൽ ഒയാർസബാൽ, ക്രിസ്റ്റ്യാനോ റൊണാൾഡോ തുടങ്ങിയ പ്രമുഖ താരങ്ങൾ അണിനിരന്ന പ്രീ ക്വാർട്ടർ പോരാട്ടത്തിൽ നിരവധി ഗോളുകൾ പിറക്കുമെന്ന് പ്രതീക്ഷിച്ചിരുന്ന മത്സരമായിരുന്നു സ്പെയിൻ- പോർച്ചു​ഗ​ൽ പോരാട്ടം. ഒടുവിൽ സ്പെയിൻ 1-0 ന് വിജയം നേടുകയായിരുന്നു. കളിയുടെ അവസാന നിമിഷങ്ങളിൽ മികേൽ മെറിനോ നേടിയ ഉജ്ജ്വല ഗോളാണ് സ്പെയിനിനെ ക്വാർട്ടർ ഫൈനലിലേക്ക് നയിച്ചത്.

അവസാന 16ൽ പോർച്ചു​ഗലിനെ വീഴ്ത്തി ചരിത്ര നേട്ടത്തോടെയാണ് സ്പെയിൻ ക്വാർട്ടർ ഉറപ്പിച്ചത്. ഫിഫ ലോകകപ്പ് ചരിത്രത്തിൽ സമാനതകളില്ലാത്ത നേട്ടമായിരുന്നു സ്പെയിനിന്റേത്. ലോകകപ്പ് ടൂർണമെന്റിൽ തുടർച്ചയായി ആറ് മത്സരങ്ങളിൽ ഒരൊറ്റ ഗോൾ പോലും വഴങ്ങാതെ മുന്നേറുന്ന ആദ്യ ടീമെന്ന ചരിത്ര നേട്ടമാണ് സ്പെയിൻ കൈവരിച്ചത്.

മത്സരത്തിന് ഇറങ്ങും മുൻപ് ഈ ലോകകപ്പ് പതിപ്പ് തന്റെ കരിയറിലെ അവസാനത്തേതായിരിക്കുമെന്ന് സൂപ്പർ താരവും നായകനുമായ റൊണാൾഡോ പ്രഖ്യാപിച്ചിരുന്നു. എന്നാലും കരിയറിലെ 1,000 പ്രൊഫഷണൽ ഗോളുകൾ എന്ന നാഴികക്കല്ല് ലക്ഷ്യമിടുന്നതിനാൽ അന്താരാഷ്ട്ര ഫുട്ബോളിലെ തന്റെ ഭാവിയെക്കുറിച്ച് അദ്ദേഹം വ്യക്തമായ സൂചനകളൊന്നും ഇതുവരെ നൽകിയിട്ടില്ല.