നോട്ടിങ്ഹാം: 145-5 എന്ന നിലയില്‍ നിന്നാണ് 95 റണ്‍സ് ഒന്നാം ഇന്നിങ്‌സ് ലീഡ് എന്ന സ്‌കോറിലേക്ക് കെ എല്‍ രാഹുലും രവീന്ദ്ര ജഡേജയും ചേര്‍ന്ന് ഇന്ത്യയെ ഉയര്‍ത്തി കൊണ്ടുവന്നത്. ഇവിടെ അര്‍ധ ശതകം പൂര്‍ത്തിയാക്കിയ ജഡേജ ടെസ്റ്റില്‍ 2000 റണ്‍സ് എന്ന നേട്ടം പിന്നിട്ടു. 

200 വിക്കറ്റും 2000 റണ്‍സും ടെസ്റ്റ് ക്രിക്കറ്റില്‍ നേടുന്ന അഞ്ചാമത്തെ ഇന്ത്യന്‍ താരമാണ് രവീന്ദ്ര ജഡേജ. കപില്‍ ദേവ്, അശ്വിന്‍, അനില്‍ കുംബ്ലേ, ഹര്‍ഭജന്‍ സിങ് എന്നിവരുടെ നേട്ടത്തിനൊപ്പമാണ് ഇവിടെ രവീന്ദ്ര ജഡേജ എത്തിയത്. 

53 ടെസ്റ്റില്‍ നിന്നാണ് 2000 റണ്‍സും 200 വിക്കറ്റും ജഡേജ തന്റെ അക്കൗണ്ടിലേക്ക് ചേര്‍ത്തത്. ഇംഗ്ലണ്ടിന്റെ ഇയാന്‍ ബോതമാണ് ഈ നേട്ടത്തിലേക്ക് ഏറ്റവും വേഗത്തിലെത്തിയത്. 42 ടെസ്റ്റുകള്‍ മാത്രമാണ് ഇതിനായി ഇംഗ്ലണ്ട് താരത്തിന് വേണ്ടി വന്നത്. 

50 ടെസ്റ്റില്‍ നിന്നാണ് കപില്‍ ദേവിന്റെ നേട്ടം. പാകിസ്ഥാന്റെ ഇമ്രാന്‍ ഖാനും 50 ടെസ്റ്റില്‍ നിന്ന് 200 വിക്കറ്റും 2000 റണ്‍സും കണ്ടെത്തി. 51 ടെസ്റ്റില്‍ നിന്നാണ് ഇന്ത്യന്‍ ഓഫ് സ്പിന്നര്‍ ആര്‍ അശ്വിന്‍ ഈ നേട്ടം സ്വന്തമാക്കിയത്. 

ഇംഗ്ലണ്ടിനെതിരായ ആദ്യ ടെസ്റ്റില്‍ ഇന്ത്യയുടെ ഒന്നാം ഇന്നിങ്‌സില്‍ 86 പന്തില്‍ നിന്നാണ് ജഡേജ 56 റണ്‍സ് നേടിയത്. എട്ട് ഫോറും ഒരു സിക്‌സും ഇവിടെ ജഡേജയുടെ ബാറ്റില്‍ നിന്ന് വന്നു.