ദുബായ്: ഐസിസിയുടെ ജനുവരി മാസത്തിലെ മികച്ച പുരുഷ താരത്തിനുള്ള പുരസ്കാരം ഇന്ത്യയുടെ ശുഭ്മാൻ ​ഗില്ലിന്. ഇം​ഗ്ലണ്ടിന്റെ അണ്ടർ 19 ടീം ക്യാപ്റ്റൻ ​​ഗ്രേസ് സ്ക്രൈവൻസിനാണ് മികച്ച വനിതാ താരം. ന്യൂസിലൻഡ‍് താരം ഡെവോൺ കോൺവെ, ഇന്ത്യയുടെ തന്നെ മുഹമ്മദ് സിറാജ് എന്നിവരെയാണ് ശുഭ്മാൻ ​ഗിൽ പിന്തള്ളിയത്. 

ഏകദിന, ടി20 ഫോർമാറ്റിൽ സമീപ കാലത്ത് മിന്നും ഫോമിൽ കളിക്കുന്ന താരമാണ് ശുഭ്മാൻ ​ഗിൽ. ശ്രീലങ്ക, ന്യൂസിലൻഡ് ടീമുകൾക്കെതിരെ താരം ഉജ്ജ്വല ബാറ്റിങ് പുറത്തെടുത്തിരുന്നു. ജനുവരി മാസത്തിൽ മാത്രം താരം ഒരു ഇരട്ട സെഞ്ച്വറിയും മൂന്ന് സെഞ്ച്വറിയും ഒരു അർധ സെഞ്ച്വറിയും കുറിച്ചു. 

ജനുവരിയില്‍ രണ്ട് ഫോര്‍മാറ്റില്‍ നിന്നുമായി 567 റണ്‍സാണ് ഗില്‍ അടിച്ചുകൂട്ടിയത്. 23 കാരനായ ഗില്‍ ന്യൂസിലന്‍ഡിനെതിരായ ഏകദിനത്തില്‍ ഇരട്ട സെഞ്ച്വറിയും ടി20യില്‍ സെഞ്ച്വറിയും നേടി ചരിത്രമെഴുതിയിരുന്നു. ന്യൂസിലന്‍ഡിനെതിരായ ഏകദിന പരമ്പരയിലെ ആദ്യ മത്സരത്തിലാണ് താരം ഇരട്ട സെഞ്ച്വറി കുറിച്ചത്. താരം 149 പന്തുകളില്‍ നിന്ന് 208 റണ്‍സെടുത്തു. രണ്ടാം മത്സരത്തില്‍ പുറത്താവാതെ 40 റണ്‍സെടുത്ത താരം മൂന്നാം ഏകദിനത്തില്‍ സെഞ്ച്വറി നേടി വീണ്ടും മികവ് പുലർത്തി. 112 റണ്‍സാണ് ഗില്‍ നേടിയത്. 

പിന്നാലെ ടി20 പരമ്പരയിലെ മൂന്നാം മത്സരത്തില്‍ 63 പന്തുകളില്‍ നിന്ന് പുറത്താവാതെ 126 റണ്‍സാണ് ഗില്‍ അടിച്ചു കൂട്ടിയത്. ശ്രീലങ്കയ്‌ക്കെതിരായ ഏകദിന പരമ്പരയിലെ ആദ്യ മത്സരത്തില്‍ 70 റണ്‍സാണ് ഗില്‍ നേടിയത്. മൂന്നാം മത്സരത്തില്‍ താരം ശതകം കുറിച്ചു. 97 പന്തില്‍ നിന്ന് 116 റണ്‍സാണ് താരം അടിച്ചെടുത്തത്. 

അണ്ടർ 19 ലോകകപ്പിൽ ഇം​ഗ്ലണ്ടിനെ ഫൈനലിലേക്ക് നയിക്കാൻ ​ഗ്രേസ് സ്ക്രൈവൻസിന് സാധിച്ചു. ഫൈനലിൽ ഇന്ത്യയോട് തോറ്റെങ്കിലും ടൂർണമെന്റിൽ താരം മിന്നും ഫോമിലാണ് കളിച്ചത്. ഓൾറൗണ്ട് മികവ് പുലർത്തിയാണ് താരം ടീമിനെ മുന്നിൽ നിന്ന് നയിച്ചത്. ഐസിസിയുടെ മികച്ച താരത്തിനുള്ള പ്ലെയർ ഓഫ് ദി മന്ത് പുരസ്കാരം നേടുന്ന ഏറ്റവും പ്രായം കുറഞ്ഞ വനിതാ താരമെന്ന റെക്കോർഡും ​ഗ്രേസ് സ്വന്തമാക്കി. 

ലോകകപ്പിലെ ഏഴ് മത്സരങ്ങളില്‍ നിന്ന് 293 റണ്‍സാണ് ഗ്രേസ് അടിച്ചുകൂട്ടിയത്. 41.85 ആണ് ശരാശരി. ഒന്‍പത് വിക്കറ്റുകളും താരം സ്വന്തമാക്കി. ഓസ്‌ട്രേലിയയുടെ ബെത്ത് മൂണി, ഫോബെ ലിച്ച്ഫീല്‍ഡ് എന്നിവരെ മറികടന്നാണ് ഗ്രേസിന്റെ പുരസ്കാര നേട്ടം.

ഈ വാര്‍ത്ത കൂടി വായിക്കൂ

ഇംഗ്ലണ്ടിന് ഏകദിന ലോകകപ്പ് സമ്മാനിച്ച നായകന്‍; ഇയാന്‍ മോര്‍ഗന്‍ വിരമിച്ചു

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ