ന്യൂഡല്‍ഹി: ഇംഗ്ലണ്ടിനെതിരായ രണ്ടാം ടെസ്റ്റില്‍ രണ്ടു ഇന്നിങ്സുകളിലും റെക്കോര്‍ഡ് പ്രകടനം പുറത്തെടുത്ത ഇന്ത്യന്‍ ക്യാപ്റ്റന്‍ ശുഭ്മാന്‍ ഗില്ലിന് ഐസിസി ടെസ്റ്റ് ബാറ്റിങ് റാങ്കിങ്ങില്‍ കുതിപ്പ്. നേരത്തെ 21-ാം സ്ഥാനത്തായിരുന്ന ഗില്ലിന്റെ ഇംഗ്ലണ്ടിനെതിരായ മത്സരത്തില്‍ രണ്ടു ഇന്നിങ്‌സുകളിലും സെഞ്ച്വറി നേടിയതാണ് നേട്ടത്തിന് കാരണം. നിലവില്‍ 15 പേരെ പിന്തള്ളി ആറാം സ്ഥാനത്താണ് ഗില്‍.

രണ്ടാം ടെസ്റ്റില്‍ ആദ്യ ഇന്നിങ്‌സില്‍ 269 റണ്‍സ് നേടിയ ഗില്‍ രണ്ടാം ഇന്നിങ്‌സില്‍ അതേ പ്രകടനം പുറത്തെടുക്കുകയായിരുന്നു. 161 റണ്‍സുമായി വെടിക്കെട്ട് ബാറ്റിങ് ആണ് ഗില്‍ കാഴ്ചവെച്ചത്. അതേസമയം ജോ റൂട്ടിനെ പിന്തള്ളി ഇംഗ്ലണ്ടിന്റെ തന്നെ ഹാരി ബ്രൂക്ക് ഒന്നാം സ്ഥാനത്ത് എത്തി.

മത്സരത്തില്‍ ഇന്ത്യ 1000 റണ്‍സിലധികം റണ്‍സ് ആണ് സ്‌കോര്‍ ചെയ്തത്. ഇംഗ്ലണ്ടിനെ 336 റണ്‍സിന് പരാജയപ്പെടുത്തി, പരമ്പര 1-1ന് സമനിലയിലാക്കി. ആന്‍ഡേഴ്‌സണ്‍-ടെണ്ടുല്‍ക്കര്‍ ട്രോഫിയുടെ തുടക്കത്തിലാണ് ഇന്ത്യയുടെ ടെസ്റ്റ് ക്യാപ്റ്റനായി ഗില്‍ ചുമതലയേറ്റത്. രണ്ട് ടെസ്റ്റുകളില്‍ നിന്ന് 585 റണ്‍സ് ആണ് ഗില്‍ നേടിയത്. ഇതില്‍ രണ്ട് സെഞ്ച്വറിയും ഒരു ഡബിള്‍ സെഞ്ച്വറിയും ഉള്‍പ്പെടുന്നു.

അതേസമയം, പുതിയ റാങ്കിങ്ങില്‍ യശസ്വി ജയ്സ്വാള്‍ നാലാം സ്ഥാനം നിലനിര്‍ത്തി. പരമ്പരയിലെ ആദ്യ മത്സരത്തില്‍ സെഞ്ച്വറി നേടിയ ഇടംകൈയ്യന്‍ ഓപ്പണര്‍ ബര്‍മിംഗ്ഹാം ടെസ്റ്റിന്റെ ആദ്യ ഇന്നിംഗ്സില്‍ 87 റണ്‍സ് നേടി. പരമ്പരയില്‍ സ്ഥിരതയാര്‍ന്ന പ്രകടനം കാഴ്ചവച്ചിട്ടും വിക്കറ്റ് കീപ്പര്‍ ബാറ്റര്‍ ഋഷഭ് പന്ത് ഒരു സ്ഥാനം താഴ്ന്ന് ഏഴാം സ്ഥാനത്തേക്ക് പിന്തള്ളപ്പെട്ടു. ആദ്യ ടെസ്റ്റിലെ രണ്ട് ഇന്നിങ്‌സുകളിലും സെഞ്ച്വറി നേടിയ പന്ത്, തുടര്‍ന്ന് ബര്‍മിംഗ്ഹാമില്‍ നടന്ന രണ്ടാം ടെസ്റ്റിന്റെ രണ്ടാം ഇന്നിങ്‌സില്‍ 65 റണ്‍സ് നേടി.