മുംബൈ: ബൗളിങ് ആക്ഷൻ പൂർത്തിയാകുന്നതിന് മുൻപ് നോൺസ്ട്രൈക്കർ ക്രീസ് വിട്ടാൻ ബൗളർക്ക് ഫ്രീ ബോൾ അനുവദിക്കണം എന്ന് ഇന്ത്യൻ സ്പിന്നർ ആർ അശ്വിൻ. ഈ ഫ്രീ ബോളിൽ ബൗളർക്ക് വിക്കറ്റ് ലഭിച്ചാൽ 10 റൺസ് ബൗളർ വഴങ്ങിയ റൺസിൽ നിന്ന് കുറയ്ക്കണം എന്നും അശ്വിൻ പറഞ്ഞു. 

ഫ്രീ ഹിറ്റ് എന്നത് എടുത്ത് കളയേണ്ടതാണെന്ന സഞ്ജയ് മഞ്ജരേക്കറുടെ പരാമർശത്തോട് പ്രതികരിക്കുകയായിരുന്നു അശ്വിൻ. ഫ്രീഹിറ്റ് എന്നത് ഒരു വലിയ മാർക്കറ്റിങ് ടൂൾ ആണ്. എല്ലാ ആരാധകരുടേയും ശ്രദ്ധ അത് നേടിക്കഴിഞ്ഞു. നമുക്ക് നോൺസ്ട്രൈക്കർ നേരത്തെ ക്രീസ് വിടുമ്പോൾ ബൗളർക്കും ഫ്രീ ബോൾ കൊടുക്കാം. ആ ബോളിൽ വിക്കറ്റ് വീണാൽ ബൗളറുടെ കണക്കിൽ നിന്ന് 10 റൺസ് കുറയ്ക്കുകയും ചെയ്യാം, അശ്വിൻ ട്വിറ്ററിൽ കുറിച്ചു.

ബൗളറുടെ കയ്യിൽ നിന്ന് പന്ത് റിലീസ് ആയതിന് ശേഷം മാത്രമാണ് ക്രീസിൽ നിന്ന് പുറത്തിറങ്ങാൻ നിങ്ങൾക്ക് അനുവാദമുള്ളത്. അശ്വിന്റെ ഫ്രീബോൾ എന്ന ആശയത്തെ പിന്തുണച്ച് ഇന്ത്യൻ മുൻ താരം ദീപ് ദാസ്​ഗുപ്തയും എത്തി. ഫ്രീ ബോൾ എന്നത് ഒരു ഡോട്ട് ബോൾ ആണ്. എന്നാൽ വിക്കറ്റ് വീണാൽ അതിന് വിലയുണ്ടാവും, ദീപ്ദാസ് ​ഗുപ്ത പറഞ്ഞു.