ബ്യൂണസ് ഐറിസ്: എഫ്ഐഎച്ച് പ്രോ ലീഗ് ഹോക്കിയില്‍ ഒളിമ്പിക് ചാമ്പ്യന്മാരായ അര്‍ജന്റീനയ്ക്കെതിരെ ഇന്ത്യയ്ക്ക് ജയം. നിശ്ചിതസമയത്ത് ഇരുടീമുകളും തുല്യത (2-2) പാലിച്ച കളിയിൽ ഷൂട്ടൗട്ടിലാണ് ഇന്ത്യ അര്‍ജന്റീനയെ കീഴടക്കിയത് (3-2). ഷൂട്ടൗട്ടില്‍ മൂന്ന് സേവുകളുമായി നിറഞ്ഞുനിന്ന മലയാളി ഗോള്‍കീപ്പര്‍ പി ആര്‍ ശ്രീജേഷ് മികച്ച പ്രകടനം പുറത്തെടുത്തു. 

ലളിത് ഉപാധ്യായ്, രൂപീന്ദര്‍പാല്‍സിങ്, ദില്‍പ്രീത് സിങ് എന്നിവരാണ് ഇന്ത്യയ്ക്കുവേണ്ടി ​ഗോൾവല കുലുക്കിയത്. നിശ്ചിതസമയത്ത് ഇന്ത്യയുടെ രണ്ടു ​ഗോളും ഹര്‍മന്‍പ്രീതാണ് നേടിയത്. കളിതീരാന്‍ ആറു സെക്കന്‍ഡ് മാത്രം ബാക്കിനില്‍ക്കെ ഹര്‍മന്‍പ്രീത് സിങ് നേടിയ ഗോളിലാണ് ഇന്ത്യ അര്‍ജന്റീനയെ പിടിച്ചുനിര്‍ത്തിയത്. അര്‍ജന്റീനയ്ക്കുവേണ്ടി മാര്‍ട്ടിന്‍ ഫെറെയ്‌റോ ഇരട്ടഗോള്‍ നേടി.