സിഡ്നി: ആര്ക്ക് മുന്നിലും തലകുനിക്കാന് ഒരുക്കമല്ലാത്ത പവര് ഹൗസ് ആണ് ഇന്ത്യയെന്ന് ബ്രെറ്റ് ലീ. വരാനിരിക്കുന്ന അഞ്ച് മത്സരങ്ങളുടെ ടെസ്റ്റ് പരമ്പരയില് ഇന്ത്യയെ നേരിടാന് പോകുന്ന ഓസ്ട്രേലിയയ്ക്ക് മുന്നറിയിപ്പ് നല്കി കൊണ്ടായിരുന്നു മുന് പേസറുടെ അഭിപ്രായപ്രകടനം. ന്യൂസിലന്ഡിന് എതിരായ ടെസ്റ്റ് മത്സരത്തില് എട്ടുവിക്കറ്റിന് ഇന്ത്യ പരാജയപ്പെട്ടതിന് പിന്നാലെയായിരുന്നു ബ്രെറ്റ് ലീയുടെ പ്രതികരണം.
ലോക ടെസ്റ്റ് ചാമ്പ്യന്ഷിപ്പില് തുടര്ച്ചയായ മൂന്നാം ഫൈനലിന് യോഗ്യത നേടുകയെന്ന ലക്ഷ്യത്തോടെയാണ് ഇന്ത്യ അടുത്ത മാസം ഓസ്ട്രേലിയയിലേക്ക് പോകുന്നത്. 'ഈ കാലത്തും ഇന്ത്യ തലകുനിക്കാന് ഒരുക്കമല്ലാത്ത ഒരു ശക്തികേന്ദ്രമാണ്. എങ്ങനെ ജയിക്കണമെന്ന് അവര്ക്കറിയാം, ഓസ്ട്രേലിയയെ തോല്പ്പിക്കാന് കഴിയുമെന്നും അവര്ക്കറിയാം. കിവീസിനെ തോല്പ്പിക്കാന് കഴിയുമെന്നും അവര്ക്കറിയാം. ഏത് ദിവസവും ആരെയും തോല്പ്പിക്കാന് കഴിയുമെന്നും അവര്ക്കറിയാം,'- ബ്രെറ്റ് ലീ ഫോക്സ് ക്രിക്കറ്റിനോട് പറഞ്ഞു.
കിവീസിനെതിരായ ബംഗളൂരു ടെസ്റ്റില് ഇന്ത്യയെ ബാസ്ബോള് സ്വാധീനിച്ചിരിക്കാം. അതുകൊണ്ടായിരിക്കാം ചില ലൂസ് ഷോട്ടുകള് കളിക്കാന് ഇടയായത്. അവര് കളിച്ച രീതിയില് അവര് ഒട്ടും അഭിമാനിക്കാന് ഇടയില്ല. ലൂസ് ഷോട്ടുകളാണ് അവര് കളിച്ചത്. മൂടിക്കെട്ടിയ സാഹചര്യത്തില് ആദ്യം ബാറ്റ് ചെയ്യാനുള്ള ഇന്ത്യയുടെ തീരുമാനം എല്ലാവരെയും അമ്പരപ്പിച്ചു. ആദ്യ ഇന്നിംഗ്സില് ടീം 46 റണ്സിനാണ് പുറത്തായത്. അപകടസാധ്യത കണക്കാക്കേണ്ടതുണ്ടായിരുന്നു. ഇന്ത്യക്കാര് സാഹചര്യങ്ങള് നന്നായി വിലയിരുത്തേണ്ടതായിരുന്നുവെന്നും അദ്ദേഹം കൂട്ടിച്ചേര്ത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates