ബ്രിസ്ബെയ്ന്: ഇന്ത്യന് താരങ്ങളായ മുഹമ്മദ് സിറാജ്, ജസ്പ്രിത് ബുമ്റ എന്നിവര്ക്ക് നേരെ സിഡ്നി ടെസ്റ്റില് കാണികള് വംശീയ അധിക്ഷേപം നടത്തിയത് വിവാദമായിരുന്നു. ഇതിനെതിരെ ബിസിസിഐ പരാതി നല്കുകയും ചെയ്തു. അതിനിടെ നാലാം ടെസ്റ്റിന്റെ ഒന്നാം ദിനത്തില് ബ്രിസ്ബെയ്നില് വച്ചും മുഹമ്മദ് സിറാജിന് നേരെ വീണ്ടും വംശീയ അധിക്ഷേപമുണ്ടായതായി റിപ്പോര്ട്ടുകളാണ് ഇപ്പോള് പുറത്തു വരുന്നത്.
പരിക്കേറ്റ് മുതിര്ന്ന പേസര്മാര് വിട്ടുനില്ക്കുന്ന നാലാം ടെസ്റ്റില് ഇന്ത്യന് പേസ് ഡിപാര്ട്ട്മെന്റിനെ നയിക്കുന്നത് സിറാജാണ്. മത്സരത്തിനിടെ സിറാജിന് നേരെ കാണികളില് ഒരു കൂട്ടര് വംശീയ അധിക്ഷേപം നടത്തിയെന്ന് ഓസ്ട്രേലിയന് മാധ്യമങ്ങള് റിപ്പോര്ട്ട് ചെയ്തു.
സിറാജിനെ നോക്കി ഒരു കൂട്ടം കാണികള് 'നീ ഒരു വൃത്തികെട്ട പുഴു'വാണെന്ന് പറഞ്ഞതായാണ് റിപ്പോര്ട്ടുകളില് ഉള്ളത്. 'ഞങ്ങളെ ഒന്ന് ആവേശം കൊള്ളിക്കൂ വൃത്തിക്കെട്ട പുഴു' എന്ന് പറഞ്ഞതായും റിപ്പോര്ട്ടില് പറയുന്നു.
സിറാജിനൊപ്പം അരങ്ങേറ്റ ടെസ്റ്റ് കളിക്കുന്ന വാഷിങ്ടന് സുന്ദറിന് നേരെയും കാണികള് അധിക്ഷേപം നടത്തിയതായി മാധ്യമങ്ങള് പറയുന്നു. എന്നാല് സംഭവം സംബന്ധിച്ച് ഇന്ത്യന് ടീം ഔദ്യോഗിക പരാതികളൊന്നും നല്കിയിട്ടില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates