മെൽബൺ: ബോക്‌സിങ് ഡേ ടെസ്റ്റിൽ ഓസ്ട്രേലിയയുടെ രണ്ടാം ഇന്നിംഗ്സിനിടെ ഇന്ത്യൻ പേസർ ഉമേഷ് യാദവിനു പരിക്ക്. തൻ്റെ നാലാം ഓവർ എറിയ‌ുന്നതിനിടെയായിരുന്നു ഉമേഷ് പരിക്ക് പറ്റി മടങ്ങിയത്. ഓസീസ് ഓപ്പണർ ജോ ബേൺസിന്റെ വിക്കറ്റെടുത്ത് മികച്ച ഫോമിൽ നിൽക്കുകയായിരുന്നു താരം. താരത്തെ സ്‌കാനിങ്ങിന് വിധേയനാക്കിയെന്നാണ് ഏറ്റവും പുതിയ റിപ്പോര്‍ട്ട്.

ഇന്നിംഗ്സിലെ എട്ടാം ഓവറിലെ റണ്ണപ്പിനിടെ മുട്ട് വേദനയെ തുടർന്ന് ഉമേഷ് മൈതാനത്ത് വൈദ്യസഹായം തേടി. മുഹമ്മദ് സിറാജ് ആണ് പിന്നീട് ഈ ഓവർ പൂർത്തിയാക്കിയത്. ഇന്ത്യൻ നിരയിലെ സ്റ്റാർ പേസർമാരായ ഇശാന്ത് ശർമ്മ, മുഹമ്മദ് ഷമി എന്നിവർ പരിക്ക് കാരണം കളിക്കാതിരിക്കേ ഉമേഷിനും പരിക്കേൽക്കുന്നത് ടീമിന് കടുത്ത തിരിച്ചടിയാകും. ആദ്യ ടെസ്റ്റിലെ രണ്ടാം ഇന്നിംഗ്സിലാണ് മുഹമ്മദ് ഷമിക്കു പരിക്കേറ്റത്. ഷമിക്ക് പകരമാണ് സിറാജ് ടീമിൽ ഇടം നേടിയത്. 

മെൽബണിൽ ഇന്ത്യ ഒന്നാം ഇന്നിംഗ്‌സിൽ 131 റൺസിൻറെ ലീഡ് സ്വന്തമാക്കിയിട്ടുണ്ട്. രണ്ടാം ഇന്നിംഗ്സിൽ ഓസ്ട്രേലിയ 71 റൺസ് എടുക്കുന്നതിനിടെ 3 വിക്കറ്റ് നഷ്ടമായിക്കഴിഞ്ഞു.