ഹൈദരാബാദ്: ഐപിഎല്ലില്‍ ചെന്നൈ സൂപ്പര്‍ കിങ്‌സ് തുടര്‍ച്ചയായ രണ്ടാം തോല്‍വി ഏറ്റുവാങ്ങിയ പോരാട്ടത്തില്‍ ശ്രദ്ധേയമായി സണ്‍റൈസേഴ്‌സ് ഹൈദരാബാദ് നായകന്‍ പാറ്റ് കമ്മിന്‍സിന്റെ സ്‌പോര്‍ട്‌സ്മാന്‍ സ്പിരിറ്റ് സമീപനം. മത്സരത്തില്‍ രവീന്ദ്ര ജഡേജയെ ഫീല്‍ഡിങ് തടസപ്പെടുത്തിയതിനു ഔട്ടാക്കാനുള്ള അവസരം വേണ്ടെന്നു വച്ചാണ് കമ്മിന്‍സ് കൈയടി നേടിയത്.

ഫീല്‍ഡിങ് തടസപ്പെടുത്തിയതിന്റെ പേരില്‍ ജഡേജയെ ഔട്ടാക്കാനുള്ള അവസരം എസ്ആര്‍എച്ചിനുണ്ടായിരുന്നു. ടീം നടത്തിയ അപ്പീലാണ് നായകന്‍ വേണ്ടെന്നു വച്ചത്.

ചെന്നൈ ബാറ്റിങിന്റെ 19ാം ഓവറിലാണ് സംഭവം. ഭുവനേശ്വര്‍ കുമാര്‍ എറിഞ്ഞ ഈ ഓവറിലെ ഒരു പന്ത് തട്ടിയിട്ട് ജഡേജ ഓടാന്‍ ശ്രമിക്കുന്നതിനിടെയാണ് ഫീല്‍ഡിങ് തടസപ്പെടുത്തിയത്. പന്ത് നേരെ ഭുവനേശ്വര്‍ കുമാറിന്റെ കൈയില്‍ തന്നെ കിട്ടി. ജഡേജയെ റണ്ണൗട്ടാക്കാനുള്ള അവസരവും താരത്തിനു ലഭിച്ചു. എന്നാല്‍ ഭുവനേശ്വര്‍ സ്റ്റംപ് കണക്കാക്കി എറിഞ്ഞ പന്ത് ജഡേജയുടെ ദേഹത്ത് തട്ടി തെറിച്ചു. ജഡേജയുടെ ദേഹത്ത് തട്ടിയില്ലായിരുന്നെങ്കില്‍ പന്ത് സ്റ്റംപില്‍ കൊണ്ട് താരം റണ്ണൗട്ടാകുമായിരുന്നു.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

പിന്നാലെ ഹൈദരാബാദ് വിക്കറ്റ് കീപ്പര്‍ ഹെയ്ന്റിച് ക്ലാസന്‍ ജഡേജ ഫീല്‍ഡ് തടസപ്പെടുത്തിയെന്നു അമ്പയര്‍മാരോടു പറഞ്ഞു. തീരുമാനം മൂന്നാം അമ്പയര്‍ക്ക് വിടാന്‍ ഫീല്‍ഡ് അമ്പയര്‍മാര്‍ തീരുമാനിച്ചു.

അതിനിടെയാണ് കമ്മിന്‍സ് അപ്പീല്‍ പിന്‍വലിച്ചത്. ജഡേജ ബാറ്റിങും തുടര്‍ന്നു. മത്സരത്തില്‍ എസ്ആര്‍എച് സ്വന്തം തട്ടകത്തില്‍ ആറ് വിക്കറ്റിന്റെ വിജയമാണ് സ്വന്തമാക്കിയത്.