ദുബായ്: ട്വന്റി20 റാങ്കിങ്ങില്‍ അഞ്ചാം സ്ഥാനത്തേക്ക് കയറി ഇന്ത്യന്‍ നായകന്‍ വിരാട് കോഹ് ലി. ഇംഗ്ലണ്ടിനെതിരായ പരമ്പരയില്‍ തുടരെ രണ്ട് അര്‍ധ ശതകം നേടിയതോടെയാണ് കോഹ് ലി റാങ്കിങ്ങില്‍ ഒരു സ്ഥാനം മെച്ചപ്പെടുത്തി അഞ്ചാം സ്ഥാനത്തേക്ക് എത്തിയത്. 

ആദ്യ മൂന്ന് ടി20യിലും നിരാശപ്പെടുത്തിയ കെ എല്‍ രാഹുല്‍ ഒരു സ്ഥാനം താഴേക്ക് ഇറങ്ങി നാലാം റാങ്കിലേക്ക് എത്തി. ബാബര്‍ അസം മൂന്നാം സ്ഥാനത്തേക്ക് കയറിയപ്പോള്‍ ഡേവിഡ് മലന്‍ ഒന്നാം സ്ഥാനത്തും ആരോണ്‍ ഫിഞ്ച് രണ്ടാമതും തുടരുന്നു. 

ഇന്ത്യക്കെതിരായ മൂന്നാം ടി20യിലെ 83 റണ്‍സ് ഇന്നിങ്‌സോടെ അഞ്ച് സ്ഥാനങ്ങള്‍ മുന്‍പോട്ട് കയറി ബട്ട്‌ലര്‍ 19ാം റാങ്കിലെത്തി. 17ാം റാങ്ക് ആണ് ബട്ട്‌ലറിന്റെ കരിയര്‍ ബെസ്റ്റ്. ബെയര്‍സ്‌റ്റോ രണ്ട് സ്ഥാനങ്ങള്‍ മുകളിലേക്ക് കയറി 14ാം റാങ്കിലെത്തി. 

ജോഫ്ര ആര്‍ച്ചര്‍ 34ാം റാങ്കിലെത്തി. മാര്‍ക്ക് വുഡ് 39ാം റാങ്കും സാം കറാന്‍ 74ാം റാങ്കിലുമെത്തി. ശ്രേയസ് അയ്യര്‍ 31ാം റാങ്കിലേക്കും റിഷഭ് പന്ത് 80ാം റാങ്കും തൊട്ടു. ബാറ്റ്‌സ്മാന്‍ ഓള്‍റൗണ്ടര്‍മാരില്‍ വാഷിങ്ടണ്‍ സുന്ദര്‍ രണ്ട് സ്ഥാനങ്ങള്‍ മുന്‍പോട്ട് കയറി 11ാം റാങ്കിലെത്തി.