ന്യൂഡല്ഹി: ഇംഗ്ലണ്ടിനെതിരായ മൂന്നാം ടെസ്റ്റിലെ മൂന്നാം ദിനം ഇന്ത്യക്ക് നിര്ണായകമാണ്. ഇന്ത്യയുടെ മുന്നിര ബാറ്റ്സ്മാന്മാര് താളം കണ്ടെത്തിയില്ലെങ്കില് പരമ്പര സമനിലയിലാക്കാന് ഇംഗ്ലണ്ടിനാവും. എന്നാലിവിടെ രണ്ടാം ഇന്നിങ്സില് കോഹ് ലിയുടെ സെഞ്ചുറി പ്രവചിക്കുകയാണ് രാജസ്ഥാന് റോയല്സ് താരം റിയാന് പരാഗ്.
രണ്ടാം ഇന്നിങ്സില് കോഹ് ലിയുടെ സെഞ്ചുറി എന്നാണ് പരാഗ് ട്വിറ്ററില് കുറിച്ചത്. 2019 നവംബറിലാണ് കോഹ്ലി അവസാനമായി ഇന്ത്യക്ക് വേണ്ടി സെഞ്ചുറി നേടിയത്. ബംഗ്ലാദേശിന് എതിരെ ഈഡന് ഗാര്ഡനിലായിരുന്നു അത്. അതിന് ശേഷം രാജ്യാന്തര ക്രിക്കറ്റില് സെഞ്ചുറിയിലേക്ക് എത്താന് കോഹ് ലിക്ക് കഴിഞ്ഞിട്ടില്ല.
ഇംഗ്ലണ്ടിനെതിരായ ടെസ്റ്റില് പരമ്പരയില് അഞ്ച് ഇന്നിങ്സ് പിന്നിടുമ്പോഴും ഒരു അര്ധ ശതകം കോഹ് ലിയുടെ പേരിലേക്ക് എത്തിയില്ല. ഇതില് മൂന്ന് വട്ടവും 30ന് മുകളില് സ്കോര് ഉയര്ത്താന് ഇന്ത്യന് നായകനായില്ല.
ലീഡ്സ് ടെസ്റ്റില് ഒന്നാം ഇന്നിങ്സില് ഇന്ത്യ 78 റണ്സിനാണ് ഓള്ഔട്ടായത്. റൂട്ട് സെഞ്ചുറിയോടെ മുന്പില് നിന്ന് നയിച്ചപ്പോള് ഇംഗ്ലണ്ടിന്റെ ലീഡ് 350നോട് അടുത്തു കഴിഞ്ഞു. മൂന്ന് ദിനം ഇനി ശേഷിക്കെ വലിയ വെല്ലുവിളിയാണ് ഇന്ത്യക്ക് മുന്പിലുള്ളത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates