മാഡ്രിഡ്: സ്പാനിഷ് ലാ ലി​ഗയിൽ ചാംപ്യൻമാരായ ബാഴ്സലോണ സീസണിലെ അപരാജിത മുന്നേറ്റം ​ഗോളടിച്ചുകൂട്ടി തുടരുന്നു. സീസണിലെ തുടരെ നാലാം ജയം സ്വന്തമാക്കി അവർ 12 പോയിന്റുമായി ഒന്നാം സ്ഥാനത്ത് കുതിപ്പ് തുടരുന്നു. എവേ പോരാട്ടത്തിൽ മെസ്റ്റല്ല സ്റ്റേഡിയത്തിൽ ബാഴ്സലോണ വലൻസിയയെ മറുപടിയില്ലാത്ത 5 ​ഗോളുകൾക്ക് തകർത്തു. ലമീൻ യമാൽ ഇരട്ട ​ഗോളുകൾ നേടിയപ്പോൾ ഫെർമിൻ ലോപ്പസ്, റഫീഞ്ഞ, പെഡ്രി എന്നിവരും കറ്റാലൻ സംഘത്തിനായി വല ചലിപ്പിച്ചു. 4 മത്സരങ്ങളിൽ നിന്നു ബാഴ്സലോണ നിലവിൽ 17 ​ഗോളുകളാണ് എതിരാളികളുടെ വലയിൽ നിക്ഷേപിച്ചത്.

മത്സരം തുടങ്ങി ആറാം മിനിറ്റിൽ തന്നെ യമാലിലൂടെ ബാഴ്സലോണ ലീഡ് എടുത്തു. ഫെർമിൻ ലോപ്പസ് നൽകിയ മനോഹരമായ പാസ് സ്വീകരിച്ച് മുന്നേറിയ യമാൽ ​ഗോൾ കീപ്പറെ കബളിപ്പിച്ച് പന്ത് വലയിലാക്കി. തൊട്ടുടത്ത മിനിറ്റിലും ഫെർമിൻ നൽകിയ പാസിൽ യമാൽ വല ചലിപ്പിച്ചെങ്കിലും വാർ പരിശോധനയിൽ അത് ഓഫ് സൈഡാണെന്നു തെളിഞ്ഞു.

22ാം മിനിറ്റിൽ ബാഴ്സലോണ രണ്ടാം ​ഗോൾ നേടി. ആന്റണി ​ഗോർഡൻ നൽകിയ പാസ് സ്വീകരിച്ച് ഫെർമിൻ ലോപ്പസ് മനോഹരമായി പന്ത് വലയിലിട്ട് ടീമിന്റെ ലീഡുയർത്തി. പിന്നീട് രണ്ടാം പകുതിയിലാണ് ശേഷിച്ച മൂന്ന് ​ഗോളുകൾ അവർ നേടുന്നത്.

50ാം മിനിറ്റിൽ റഫീഞ്ഞയുടെ വക മൂന്നാം ​ഗോൾ. ഈ ​ഗോളിനും വഴിയൊരുക്കിയ ഫെർമിൻ ലോപ്പസ് തന്നെ. 79ാം മിനിറ്റിൽ ഡാനി ഓൽമോയുമായി നടത്തിയ മികച്ച വൺ ടു നീക്കത്തിലൂടെ പെഡ്രി ബാഴ്സലോണയുടെ നാലാം ​ഗോളും നേടി. ഒടുവിൽ 84ാം മിനിറ്റിൽ ലമീൻ യമാൽ തന്റെ രണ്ടാം ​ഗോളും ടീമിന്റെ അ‍ഞ്ചാം ​ഗോളും നേടി. ഈ ​ഗോളിലേക്കും വഴിയൊരുക്കിയത് ഡനി ഓൽമോ തന്നെ.