ന്യൂഡല്‍ഹി: ഫോം കണ്ടെത്താനാവാതെ നില്‍ക്കുന്ന ഇന്ത്യന്‍ മുന്‍ ക്യാപ്റ്റന്‍ വിരാട് കോഹ്‌ലിക്ക് പിന്തുണയുമായി റോബിന്‍ ഉത്തപ്പ. കോഹ് ലിയെ വെറുതെ വിടണം എന്നാണ് ഉത്തപ്പ പറയുന്നത്. 

കോഹ് ലി റണ്‍സ് കണ്ടെത്തിയിരുന്ന സമയത്ത്, ഒന്നിന് പിറകെ ഒന്നായി സെഞ്ചുറികള്‍ നേടിയ സമയത്ത്, ഇങ്ങനെ കളിക്കണം അങ്ങനെ കളിക്കണം എന്ന് കോഹ് ലിയോട് ആരും പറഞ്ഞിട്ടില്ല. ഇപ്പോള്‍ കോഹ് ലിയോട് എങ്ങനെയാണ് കളിക്കേണ്ടത് എന്ന് പറയാന്‍ നമുക്ക് ഒരു അവകാശവും ഇല്ല. 70 സെഞ്ചുറി കോഹ് ലി നേടി. അതിന് നന്ദി പറയേണ്ടത് കോഹ് ലിയുടെ കഴിവിനോടാണ്, ഉത്തപ്പ പറയുന്നു. 

ഇനിയും 30-35 സെഞ്ചുറി കോഹ് ലിക്ക് നേടാനാവും. അതിന് കഴിയുന്നത് കോഹ് ലിക്ക് അതിനുള്ള പ്രാപ്തിയുള്ളതിനാലാണ്. നമ്മള്‍ ചെയ്യേണ്ടത് കോഹ് ലിയെ വെറുതെ വിടുക എന്നതാണ്. എന്താണ് തനിക്ക് നല്ലതായി വരിക എന്ന് കോഹ് ലിക്കറിയാം. താന്‍ നേരിടുന്ന പ്രശ്‌നം എന്തെന്ന് കോഹ് ലി മനസിലാക്കി കഴിഞ്ഞാല്‍ പിന്നെ അത് സ്വയം പരിഹരിക്കാന്‍ കോഹ് ലിക്ക് കഴിയും. അതിനുള്ള ഇടം കോഹ് ലിക്ക് നല്‍കുക മാത്രമാണ് ചെയ്യേണ്ടത്, റോബിന്‍ ഉത്തപ്പ പറഞ്ഞു. 

ഇടവേള എടുക്കുന്നതാണ് നല്ലത് എന്ന് കോഹ് ലിക്ക് തോന്നുന്നുണ്ടെങ്കില്‍ അങ്ങനെ ചെയ്യട്ടെ. ഈ പരമ്പരയോ ടൂര്‍ണമെന്റെ കളിക്കണം എന്നാണ് കോഹ്‌ലിക്ക് തോന്നുന്നത് എങ്കില്‍ അതിന് അനുവദിക്കൂ. കോഹ്‌ലിയുടെ ടീമിലെ സ്ഥാനം ചോദ്യം ചെയ്യാതിരിക്കുക. മാച്ച് വിന്നറാണ് കോഹ് ലി. ലോകത്തിലെ ഏറ്റവും മികച്ച താരങ്ങളില്‍ ഒരാള്‍. ആ കോഹ് ലിയുടെ പ്രാപ്തി ചോദ്യം ചെയ്യാനോ ടീമിലെ സ്ഥാനം ചോദ്യം ചെയ്യാനോ നമുക്ക് യാതൊരു അവകാശവും ഇല്ലെന്നും ഉത്തപ്പ പറഞ്ഞു.

ഈ വാർത്ത കൂടി വായിക്കാം 

രോഹിത്തിനും സൂര്യക്കുമൊപ്പം പന്തിന്റെ ഇന്‍സ്റ്റഗ്രാം ലൈവ്; 7 സെക്കന്റില്‍ വന്നുപോയി ധോനി

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ