തിരുവനന്തപുരം: കേരള ക്രിക്കറ്റ് ലീഗിൽ ആലപ്പി റിപ്പിൾസിന്റെ ഉപനായകൻ മുഹമ്മദ് അസ്ഹറുദ്ദീന് തകർപ്പൻ സെഞ്ച്വറി. കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന ആവേശകരമായ പോരാട്ടത്തിൽ കൊല്ലത്തിനെതിരെയാണ് സീസണിലെ ആദ്യ സെഞ്ച്വറി അസ്ഹറുദ്ദീൻ സ്വന്തമാക്കിയത്. വെറും 51 പന്തിൽ നിന്ന് 7 സിക്സറുകളും 6 ഫോറുകളും സഹിതം താരം 100 റൺസെടുത്ത് പുറത്താകാതെ നിന്നാണ് താരത്തിന്റെ വെടിക്കെട്ട് ഇന്നിങ്സ്. താരം തകർത്തടിച്ചെങ്കിലും ടീം പരാജയപ്പെട്ടത് നിരാശയായി.

അഖിൽ കെജി എറിഞ്ഞ ഏഴാം ഓവറിലാണ് അസ്ഹറുദ്ദീൻ ആക്രമണത്തിന് തുടക്കമിട്ടത്. ഒരു സിക്സും രണ്ട് ഫോറുമടക്കം 15 റൺസ് ആ ഓവറിൽ നേടി. തുടർന്ന് മോനു കൃഷ്ണ എറിഞ്ഞ പതിമൂന്നാം ഓവറിൽ രണ്ട് സിക്സും ഒരു ഫോറുമടക്കം 18 റൺസ് അടിച്ചെടുത്ത് താരം അർദ്ധ സെഞ്ചുറി തികച്ചു. മുഹമ്മദ് ഇഷാഖ് എറിഞ്ഞ പതിനഞ്ചാം ഓവറിൽ രണ്ട് സിക്സറുകളോടെ 17 റൺസും, എം.ഡി. നിധീഷ് എറിഞ്ഞ അവസാന ഓവറിൽ രണ്ട് സിക്സും ഒരു ഫോറും ഉൾപ്പെടെ 18 റൺസും അസ്ഹറുദ്ദീൻ വാരിക്കൂട്ടി.

നേരത്തെ ട്രിവാൻഡ്രം റോയൽസ്, തൃശൂർ ടൈറ്റൻസ് ടീമുകൾക്കെതിരെയും അസ്ഹറുദ്ദീൻ അർധ സെഞ്ച്വറികൾ നേടിയിരുന്നു. ഈ തകർപ്പൻ സെഞ്ച്വറിയോടെ നാല് മത്സരങ്ങളിൽ നിന്നു 253 റൺസോടെ ബാറ്റർമാരുടെ പട്ടികയിൽ ഒന്നാമതെത്തി. അസ്ഹറുദ്ദീൻ തകർപ്പൻ ഫോമിൽ തുടരുമ്പോൾ ആദ്യ കിരീടമെന്ന ആലപ്പിയുടെ പ്രതീക്ഷകളും തുടരുന്നു.