ചെന്നൈ: മുൻ ഇന്ത്യൻ ക്യാപ്റ്റനും ഇതിഹാസ താരവുമായ മഹേന്ദ്ര സിങ് ധോനിയുടെ ബൈക്ക് പ്രേമം പ്രസിദ്ധമാണ്. താരത്തിന്റെ ടു വീ​ൽ ​ഗാരേജും ഫെയ്മസാണ്. ഇപ്പോഴിതാ മദ്രാസ് ഇന്റര്‍നാഷണല്‍ സര്‍ക്യൂട്ടില്‍ സൂപ്പര്‍ ബൈക്ക് ഓടിച്ച് ധോനി ആരാധകരുടെ കൈയടി വാങ്ങുകയാണ്.

ടിവിഎസ് യൂറോഗ്രിപ് സംഘടിപ്പിച്ച പ്രൊമോഷണല്‍ പരിപാടിയില്‍ പങ്കെടുക്കാനെത്തിയപ്പോഴാണ് താരം ആരാധകരെ ആവേശത്തിലാഴ്ത്തി ട്രാക്കിലിറങ്ങിയത്. കമ്പനിയുടെ മുന്‍നിര മോട്ടോര്‍സൈക്കിള്‍ ടയറുകള്‍ പരീക്ഷിച്ചതിന് ശേഷം ഉയര്‍ന്ന വേഗതയില്‍ ട്രാക്ക് വലംവെച്ച ധോനിയുടെ ദൃശ്യങ്ങള്‍ സമൂഹ മാധ്യമങ്ങളില്‍ വൈറലാണ്.

അന്താരാഷ്ട്ര മോട്ടോര്‍ റേസിങ് സര്‍ക്യൂട്ടിലാണ് 45 കാരനായ ധോനി ബൈക്ക് ഓടിച്ചത്. റൈഡിന് ശേഷം പിറ്റ് ലെയ്‌നില്‍ തിരിച്ചെത്തിയ താരം ഹെല്‍മെറ്റ് ഊരിമാറ്റി ആരാധകരെ അഭിവാദ്യം ചെയ്തതോടെ ഗാലറി ആവേശക്കടലായി മാറി. ബൈക്കുകളോടും കാറുകളോടുമുള്ള ധോനിയുടെ അടങ്ങാത്ത അഭിനിവേശം ഒരിക്കല്‍കൂടി വ്യക്തമാക്കുന്നതായിരുന്നു ഈ പരിപാടി.