റാഞ്ചി: സ്വന്തം ഫാമിൽ പുതിയ അതിഥിയായി എത്തിയ കുഞ്ഞു സുന്ദരനായ വെള്ള കുതിരയ്ക്കൊപ്പമുള്ള മുൻ ഇന്ത്യൻ നായകൻ എംഎസ് ധോനിയുടെ വീഡിയോ സാമൂഹിക മാധ്യമങ്ങളിൽ ഹിറ്റ്. ഭാര്യ സാക്ഷി ഇൻസ്റ്റ​ഗ്രാമിൽ പങ്കിട്ട വീഡിയോയാണ് വൈറലായി മാറിയത്. ധോനിയുടെ ‘കരിങ്കോഴി കൃഷി’ മുതൽ അടുത്തിടെ പുതിയ കുതിരകളെ വാങ്ങിയത് ഉൾപ്പെടെയുള്ള വിശേഷങ്ങളെല്ലാം ആരാധകരിലേക്ക് എത്തിയതും സാക്ഷിയുടെ അക്കൗണ്ട് വഴിയായിരുന്നു. 

വെള്ള നിറത്തിലുള്ള കുഞ്ഞൻ കുതിരയ്‌ക്കൊപ്പം ധോനി ഓട്ട മത്സരം നടത്തുന്നതാണ് പുതിയ വീഡിയോ. ഇതിനകം അഞ്ച് ലക്ഷത്തോളം പേരാണ് ഇൻസ്റ്റഗ്രാമിൽ ഈ വീഡിയോ ലൈക്ക് ചെയ്തത്. ഷെട്ലാൻഡ് പൊനി എന്നറിയപ്പെടുന്ന വിഭാ​ഗത്തിലുള്ള കുഞ്ഞൻ കുതിരയാണിത്. 

വളർത്തു മൃഗങ്ങളോടും വാഹനങ്ങളോടുമുള്ള ധോനിയുടെ പ്രിയം ഏറെ പ്രശസ്തമാണ്. ധോനിക്ക് ഇതിനകം ഒരു ബെൽജിയം മാലിനോയിസ്, ഒരു വെളുത്ത ഹസ്കി, 4 ജർമൻ ഷെപ്പേർഡ് എന്നിവയുണ്ട്. പിന്നാലെയാണ് കുതിരകളേയും ഫാമിലെത്തിച്ചത്. റാഞ്ചി സർക്കുലർ റോഡിലെ എട്ട് ഏക്കറിലുള്ള ഫാം ഹൗസിൽ ധോനി കുതിരയെ മസാജ് ചെയ്യുന്ന ചിത്രങ്ങളും പുറത്തു വന്നിരുന്നു. 

ഹർമുവിലെ പഴയ വസതിയിൽ നിന്ന് 8 കിലോമീറ്റർ മാത്രം അകലെയുള്ള കൈലാസപതിയെന്ന ആഡംബര വസതിയിലാണ് ഇപ്പോൾ ക്യാപ്റ്റൻ കൂളും കുടുംബവും മാതാപിതാക്കൾക്കൊപ്പം കഴിയുന്നത്.