വെല്ലിങ്ടന്‍: ന്യൂസിലന്‍ഡിനെതിരായ രണ്ടാം ടെസ്റ്റില്‍ ഗംഭീര ജയവുമായി ഇംഗ്ലണ്ട്. രണ്ടാം ടെസ്റ്റില്‍ 323 റണ്‍സിന്റെ പടുകൂറ്റന്‍ ജയവുമായി അവര്‍ മൂന്ന് മത്സരങ്ങളടങ്ങിയ പരമ്പര 2-0ത്തിനു സ്വന്തമാക്കി.
രണ്ടാം ഇന്നിങ്സില് 583 റണ്‍സെന്ന കൂറ്റന്‍ ലക്ഷ്യത്തിലേക്ക് ബാറ്റേന്തിയ ന്യൂസിലന്‍ഡ് 259 റണ്‍സില്‍ പുറത്തായി. ഒന്നാം ഇന്നിങ്സില് വെറും 125 റണ്‍സില്‍ കിവികള്‍ പോരാട്ടം അവസാനിപ്പിച്ചിരുന്നു. ഇംഗ്ലണ്ട് ഒന്നാം ഇന്നിങ്സില് 280 റണ്‍സും രണ്ടാം ഇന്നിങ്സില് 6 വിക്കറ്റ് നഷ്ടത്തില്‍ 427 റണ്‍സുമാണ് എടുത്തത്.
രണ്ടാം ഇന്നിങ്സില് സെഞ്ച്വറിയടിച്ച് ടോം ബ്ലന്‍ഡല്‍ തിളങ്ങിയെങ്കിലും കാര്യമായ പിന്തുണ താരത്തിനു കിട്ടിയില്ല. അഞ്ചാം ടെസ്റ്റ് സെഞ്ച്വറിയാണ് താരം സ്വന്തമാക്കിയത്. 102 പന്തില്‍ 5 സിക്‌സും 13 ഫോറും സഹിതം 115 റണ്‍സെടുത്തു.
32 റണ്‍സെടുത്ത ഡാരില്‍ മിച്ചല്‍, 42 റണ്‍സെടുത്ത നതാന്‍ സ്മിത്ത് എന്നിവര്‍ മാത്രമാണ് ബ്ലന്‍ഡലിനെ പിന്തുണച്ചവര്‍. ഗ്ലന്‍ ഫിലിപ്‌സ് 16 റണ്‍ലസെടുത്തു. ക്യാപ്റ്റന്‍ ടോം ലാതമാണ് (24) രണ്ടക്കം കടന്ന മറ്റൊരാള്‍.
ഇംഗ്ലണ്ടിനായി നായകന്‍ ബെന്‍ സ്‌റ്റോക്‌സ് 3 വിക്കറ്റുകള്‍ വീഴ്ത്തി. ക്രിസ് വോക്‌സ്, ബ്രയ്ഡന്‍ കര്‍സ്, ഷൊയ്ബ് ബഷീര്‍ എന്നിവര്‍ രണ്ട് വീതം വിക്കറ്റുകള്‍ സ്വന്തമാക്കി.
നേരത്തെ 155 റണ്‍സ് ലീഡുമായി രണ്ടാം ഇന്നിങ്സ് തുടങ്ങിയ ഇംഗ്ലണ്ടിനായി സൂപ്പര്‍ ബാറ്റര്‍ ജോ റൂട്ട് സെഞ്ച്വറി നേടി. താരം 106 റണ്‍സ് കണ്ടെത്തി. ഒന്നാം ഇന്നിങ്സില് സെഞ്ച്വറി നേടിയ ഹാരി ബ്രൂക്ക് രണ്ടാം ഇന്നിങ്സില് അര്‍ധ സെഞ്ച്വറി (55) നേടി.
ഓപ്പണര്‍ ബെന്‍ ഡുക്കറ്റ് (92), ജേക്കബ് ബേതല്‍ (96) എന്നിവരുടെ സെഞ്ച്വറി നഷ്ടങ്ങള്‍ മാത്രമാണ് ഇംഗ്ലണ്ടിനു നിരാശ സമ്മാനിച്ചത്. സാക് ക്രൗളി (8) ആണ് പുറത്തായ മറ്റൊരു താരം.
നേരത്തെ നാല് വീതം വിക്കറ്റുകള്‍ വീഴ്ത്തിയ ഗസ് അറ്റ്കിന്‍സന്‍, ബ്രയ്ഡന്‍ കര്‍സ് എന്നിവരുടെ ബൗളിങാണ് കിവികളുടെ അടി തെറ്റിച്ചത്. 37 റണ്‍സെടുത്ത മുന്‍ നായകന്‍ കെയ്ന്‍ വില്ല്യംസന്‍ മാത്രമാണ് പിടിച്ചു നിന്നത്. അറ്റ്കിന്‍സന്‍ ഹാട്രിക്ക് വിക്കറ്റുകള്‍ നേടി. ന്യൂസിലന്‍ഡിനു നഷ്ടമായ അവസാന മൂന്ന് വിക്കറ്റുകള്‍ താരം അടുത്തടുത്ത പന്തുകള്‍ വീഴ്ത്തിയാണ് ഇന്നിങ്‌സിനു തിരശ്ശീലയിട്ടത്.
ഹാരി ബ്രൂക്ക് നേടിയ എട്ടാം ടെസ്റ്റ് സെഞ്ച്വറിയാണ് ഇംഗ്ലണ്ടിനു ഒന്നാം ഇന്നിങ്സില് കരുത്തായത്. ഒലി പോപ്പ് അര്‍ധ സെഞ്ച്വറി നേടിയതും നിര്‍ണായകമായി. മറ്റൊരാളും അധികം ക്രീസില്‍ നിന്നില്ല.
ബ്രൂക്ക് 115 പന്തില്‍ 11 ഫോറും 5 സിക്‌സും സഹിതം 123 റണ്‍സ് വാരി. ഒലി പോപ്പ് 66 റണ്‍സെടുത്തു.
ന്യൂസിലന്‍ഡിനായി നതാന്‍ സ്മിത്ത് നാല് വിക്കറ്റുകള്‍ വീഴ്ത്തി. വില്‍ ഓറൂര്‍ക്ക് മൂന്ന് വിക്കറ്റുകളും മാറ്റ് ഹെന്റി രണ്ട് വിക്കറ്റും സ്വന്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates