പാരിസ്: ഒളിംപിക്‌സ് ഉദ്ഘാടന ചടങ്ങിനിടെ ദക്ഷിണ കൊറിയയ്ക്ക് പകരം ഉത്തര കൊറിയയെന്നു അനൗണ്‍സ് ചെയ്ത അബദ്ധത്തില്‍ ക്ഷമ പറഞ്ഞ് അന്താരാഷ്ട്ര ഒളിംപിക് കമ്മിറ്റി (ഐഒസി). മാര്‍ച്ച് പാസ്റ്റിനായി ടീം എത്തിയപ്പോള്‍ ദക്ഷിണ കൊറിയ്ക്ക് പകരം ഉത്തര കൊറിയ എന്നാണ് ഫ്രഞ്ച് അനൗണ്‍സര്‍ മൈക്കിലൂടെ പറഞ്ഞത്. ഇതാണ് വിവാദമായത്.

മാര്‍ച്ച് പാസ്റ്റില്‍ ഫ്രഞ്ച് ആല്‍ഫബെറ്റ് അനുസരിച്ച് ദക്ഷിണ കൊറിയ 153ാം സ്ഥാനത്താണ് വന്നത്. താരങ്ങള്‍ വരേണ്ട സമയമായപ്പോള്‍ അനൗണ്‍സര്‍ 'ഡെമോക്രാറ്റിക്ക് പീപ്പിള്‍സ് റിപ്പബ്ലിക്ക് ഓഫ് കൊറിയ' (ഉത്തര കൊറിയ) എന്നാണ് ഫ്രഞ്ച് ഭാഷയില്‍ പരിചയപ്പെടുത്തിയത്. 'സൗത്ത് കൊറിയ' എന്നാണ് ദക്ഷിണ കൊറിയയുടെ ഔദ്യോഗിക പേര്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

സംഭവത്തിനു പിന്നാലെ ദക്ഷിണ കൊറിയന്‍ അധികൃതര്‍ ഇതിനെതിരെ രംഗത്തെത്തിയിരുന്നു. ഇതോടെയാണ് വലിയ രാഷ്ട്രീയ മാനങ്ങളുള്ള വിവാദമായി സംഭവം വളര്‍ന്നത്.

അബദ്ധം മനസിലാക്കിയാണ് ഒളിംപിക് കമ്മിറ്റി ക്ഷമ പറഞ്ഞ് രംഗത്തെത്തിയത്. പൂര്‍ണ മനസോടെ ക്ഷമ ചോദിക്കുന്നതായി ഐഒസി വക്താവ് പ്രസ്താവനയില്‍ വ്യക്തമാക്കി. നിരവധി പരിപാടികള്‍ കുറഞ്ഞ സമയത്തില്‍ നടക്കുന്നതിനിടെ വന്ന ഒരു പിഴവാണിത്. ഇങ്ങനെയൊരു തെറ്റ് സംഭവിച്ചതില്‍ ആഴത്തിലുള്ള ഖേദം അറിയിക്കുന്നു. സംഭവിച്ചു കഴിഞ്ഞ വിഷയത്തില്‍ ആത്മാര്‍ഥമായ ക്ഷമാപണം നടത്തുക എന്നതാണ് സംഘാടകരെന്ന നിലയില്‍ ചെയ്യാന്‍ സാധിക്കുകയെന്നും കമ്മിറ്റി വ്യക്തമാക്കി.