മെൽബൺ: ഓസ്‌ട്രേലിയൻ ഓപ്പണിന്റെ സെമിഫൈനലിൽ പ്രവേശിച്ച് ജെസിക്ക പെഗുല. ക്വാർട്ടർ ഫൈനലിൽ അമാന്‍ഡ അനിസിമോവയെ നേരിട്ടുള്ള സെറ്റുകൾക്ക് പരാജയപ്പെടുത്തിയാണ് ജെസിക്ക പെഗുല സെമി ഫൈനലിലെത്തിയത്. ഇരുവരും നേരത്തെ മൂന്ന് തവണ ഏറ്റുമുട്ടിയപ്പോഴും വിജയം പെഗുലയ്ക്കൊപ്പമായിരുന്നു.

സ്കോർ : 6-2, 7-6 (7/1)

മുൻപ് മൂന്ന് തവണ മെൽബണിൽ ക്വാർട്ടർ ഫൈനലിൽ തോൽവി അറിഞ്ഞ പെഗുലയ്ക്ക് ഈ വിജയം കൂടുതൽ ആത്മവിശ്വാസം നൽകുന്നതാണ്. വ്യാഴാഴ്ച നടക്കുന്ന സെമിഫൈനലിൽ മുൻ വിംബിൾഡൺ ചാമ്പ്യൻ എലീന റൈബാക്കിനയാണ് പെഗുലയുടെ എതിരാളി.

ടൂർണമെന്റിൽ ഇതുവരെ ഒരു സെറ്റും നഷ്ടപ്പെടുത്താതെയാണ് 31 വയസ്സുകാരിയായ പെഗുലയുടെ മുന്നേറ്റം. ആദ്യ ഗ്രാൻഡ് സ്ലാം കിരീടം ലക്ഷ്യം വെയ്ക്കുന്ന പെഗുല 2024 യുഎസ് ഓപ്പൺ ഫൈനലിസ്റ്റ് ആയിരുന്നു.