കോഴിക്കോട്: കോവിഡ് വാക്സിനേഷൻ കാര്യങ്ങളിൽ കായിക മേഖലയെ അവ​ഗണിക്കരുതെന്ന് മുഖ്യമന്ത്രി പിണറായി വിജയനോട് പി ടി ഉഷ. വരാൻ പോകുന്ന ദേശീയ അന്തർ സംസ്ഥാന ചാമ്പ്യൻഷിപ്പിൽ പങ്കെടുക്കുന്ന കായിക താരങ്ങൾക്കും മുൻഗണനാ വിഭാഗത്തിൽ ഉൾപ്പെടുത്തി വാക്സിൻ നൽകണമെന്ന് ഉഷ ആവശ്യപ്പെട്ടു. ട്വിറ്ററിലൂടെയാണ് അവർ ഇക്കാര്യം മുഖ്യമന്ത്രിയെ അറിയിച്ചിരിക്കുന്നത്. ‌

‘മുഖ്യമന്ത്രി പിണറായി വിജയനോട് ഒരു അഭ്യർഥന. കായിക താരങ്ങൾ, അവരുടെ പരിശീലകർ, മറ്റു സപ്പോർട്ട് സ്റ്റാഫ്, മെഡിക്കൽ ടീം തുടങ്ങിയവർക്ക് വരാൻ പോകുന്ന ദേശീയ മത്സരങ്ങൾ ഉൾപ്പെടെ മുൻനിർത്തി മുൻഗണനാ വിഭാഗത്തിൽ ഉൾപ്പെടുത്തി വാക്സിൻ നൽകണം. കായിക മേഖലയെ നമുക്ക് അവഗണിക്കാനാകില്ല’ എന്നാണ് ഉഷയുടെ ട്വീറ്റ്. 

ജൂൺ 25 മുതൽ 29 വരെയാണ് ദേശീയ അന്തർ സംസ്ഥാന ചാമ്പ്യൻഷിപ്പ്. ടോക്കിയോ ഒളിംപിക്സിന് യോഗ്യത നേടാൻ ഇന്ത്യൻ കായിക താരങ്ങൾക്കുള്ള അവസാന അവസരമാണ് ഈ ചാമ്പ്യൻഷിപ്പ്.