ന്യൂഡൽഹി: ഇന്ത്യൻ ടി20 ക്യാപ്റ്റൻ സൂര്യകുമാർ യാദവും കോച്ച് ഗൗതം ഗംഭീറും സഞ്ജുവിന് പിന്തുണ നൽകണമെന്ന ആവശ്യവുമായി മുൻ ഇന്ത്യൻ താരം അജിന്‍ക്യ രഹാനെ. ന്യൂസിലൻഡിനെതിരായ ടി20 പരമ്പരയിലെ മോശം പ്രകടനം സഞ്ജുവിന്റെ ആത്മവിശ്വാസത്തെ ബാധിക്കരുതെന്നും ശേഷിക്കുന്ന രണ്ട് മത്സരങ്ങളിലും 2026 ടി20 ലോകകപ്പിലും അവസരം ലഭിക്കുമെന്ന് അദ്ദേഹത്തിന് മാനേജ്‍മെന്റ് ഉറപ്പുനൽകണമെന്നും രാഹാനെ പറഞ്ഞു.

“ടീം മാനേജ്മെന്റിന്റെയും ക്യാപ്റ്റന്റെയും പങ്ക് ഈ സമയത്ത് നിർണായകമാണ്. സഞ്ജുവിനോട് നീ എല്ലാ മത്സരങ്ങളും കളിക്കും, ലോകകപ്പിലും ഉണ്ടാകും എന്ന് വ്യക്തമാക്കണം. അപ്പോൾ അവന് തന്റെ സ്ഥാനത്തെക്കുറിച്ചുള്ള ആശങ്കകൾ അവസാനിക്കും'' രഹാനെ പറഞ്ഞു.

അഭിഷേക് ശർമ പോലൊരു താരം മറുവശത്ത് മികച്ച ഫോമിലാണ്. അത് സഞ്ജുവിന്റെ സമ്മർദ്ദം വർധിപ്പിക്കും. എന്നാൽ സ്വന്തം ഗെയിം പ്ലാനിൽ ഉറച്ചുനിൽക്കുകയും സ്വയം വിശ്വസിക്കുകയുമാണ് സഞ്ജു ഇപ്പോൾ ചെയ്യേണ്ടതെന്നും അദ്ദേഹം വ്യക്തമാക്കി.

കഴിഞ്ഞ ആറുമാസത്തിനിടെ സഞ്ജു സാംസന്റെ കരിയർ ഉയർച്ചതാഴ്ചകളിലൂടെ കടന്നുപോയതായി രാഹാനെ ചൂണ്ടിക്കാട്ടി. സ്ഥിരം ഓപ്പണറായി ഉറച്ച സ്ഥാനമുണ്ടായിരുന്ന സഞ്ജുവിനെ ശുഭ്മാൻ ഗില്ലിന് അവസരം നൽകുന്നതിനായി മിഡിൽ ഓർഡറിലേക്ക് മാറ്റുകയും പിന്നീട് മോശം ഫോമിനെ തുടർന്ന് ടീമിന് പുറത്തിരുത്തുകയും ചെയ്തു.

എന്നാൽ ഗില്ലിന്റെ പരാജയങ്ങൾക്കുശേഷം സഞ്ജു വീണ്ടും ഓപ്പണറായി തിരിച്ചെത്തിയെങ്കിലും ന്യൂസിലൻഡിനെതിരെ താരത്തിന് ഇത് വരെ തിളങ്ങായിട്ടില്ല.