ആദ്യ ഇന്നിങ്‌സില്‍ ബാറ്റിങ് തകര്‍ന്ന ഇന്ത്യ രണ്ടാം ഇന്നിങ്‌സില്‍ കരുത്തു കാട്ടി. രണ്ടാം ദിനം കളി നിര്‍ത്തുമ്പോള്‍ വിക്കറ്റ് നഷ്ടമില്ലാതെ 172 റണ്‍സെന്ന നിലയിലാണ് ഇന്ത്യ. മൊത്തം 218 റണ്‍സ് ലീഡായി ഇന്ത്യക്ക്.
ഇന്ത്യന്‍ ഓപ്പണര്‍മാരായ കെഎല്‍ രാഹുല്‍- യശസ്വി ജയ്‌സ്വാള്‍ സഖ്യം സെഞ്ച്വറി കൂട്ടുകെട്ടുയര്‍ത്തി. ഇരുവരും അര്‍ധ സെഞ്ച്വറി നേടി. യശസ്വി 90 റണ്‍സും രാഹുല്‍ 62 റണ്‍സുമായും ക്രീസില്‍. പിരിയാത്ത ഒന്നാം ഇന്നിങ്‌സില്‍ ഇരുവരും ചേര്‍ന്ന് ഇതുവരെ 172 റണ്‍സ് ചേര്‍ത്തു.
നീണ്ട ഇടവേളയ്ക്ക് ശേഷം ഓസീസ് മണ്ണില്‍ ഇന്ത്യന്‍ ഓപ്പണിങ് സഖ്യം ക്ലച്ച് പിടിച്ച ഇന്നിങ്‌സ് കൂടിയാണിത്. 2004ലാണ് അവസാനമായി ഇന്ത്യന്‍ ഓപ്പണിങ് സഖ്യം ഓസീസ് മണ്ണില്‍ സെഞ്ച്വറി കൂട്ടുകെട്ടുയര്‍ത്തുന്നത്. 20 വര്‍ഷങ്ങള്‍ക്ക് മുന്‍പ് സിഡ്‌നിയില്‍ വീരേന്ദര്‍ സെവാഗ്- ആകാശ് ചോപ്ര സഖ്യമാണ് ഇതിനു മുന്‍പ് അവസാനമായി ഓസ്‌ട്രേലിയന്‍ മണ്ണില്‍ സെഞ്ച്വറി കൂട്ടുകെട്ടുയര്‍ത്തിയത്. അന്ന് 123 റണ്‍സാണ് ഇരുവരും ചേര്‍ത്തത്.
16 വര്‍ഷം മുന്‍പ് നിലവിലെ ഇന്ത്യന്‍ കോച്ച് ഗൗതം ഗംഭീര്‍ സ്ഥാപിച്ച റെക്കോര്‍ഡ് മറികടന്ന് യശസ്വി ജയ്‌സ്വാള്‍. ഒരു കലണ്ടര്‍ വര്‍ഷം ഏറ്റവും കൂടുതല്‍ ടെസ്റ്റ് റണ്‍സ് നേടുന്ന ഇന്ത്യന്‍ താരം എന്ന നേട്ടം ഇനി യശസ്വിക്ക് സ്വന്തം. 2008ല്‍ 1134 റണ്‍സ് നേടിയാണ് ഗംഭീര്‍ റെക്കോര്‍ഡിട്ടത്. യശസ്വി 1161 റണ്‍സ് നേടിയാണ് റെക്കോര്‍ഡ് സ്വന്തമാക്കിയത്.
ഈ വര്‍ഷം ടെസ്റ്റില്‍ ഏറ്റവും കൂടുതല്‍ റണ്‍സ് നേടിയ താരങ്ങളുടെ പട്ടികയില്‍ യശസ്വി ജയ്‌സ്വാള്‍ രണ്ടാം സ്ഥാനത്ത്. 1338 റണ്‍സ് നേടിയ ജോ റൂട്ടാണ് ഒന്നാം സ്ഥാനത്ത്.
യശസ്വി ജയ്‌സ്വാളിനു മറ്റൊരു റെക്കോര്‍ഡുമുണ്ട്. ഒരു കലണ്ടര്‍ വര്‍ഷം ഏറ്റവും കൂടുതല്‍ ടെസ്റ്റ് സിക്‌സുകളെന്ന റെക്കോര്‍ഡാണ് താരം നേടിയത്. മറികടന്നത് മുന്‍ ന്യൂസിലന്‍ഡ് നായകന്‍ ബ്രണ്ടന്‍ മക്കെല്ലത്തിനെ. ഓസീസിനെതിരെ രണ്ടാം ഇന്നിങ്‌സില്‍ 2 സിക്‌സുകള്‍ അടിച്ചതോടെ താരത്തിന്റെ ഈ വര്‍ഷത്തെ ടെസ്റ്റ് സിക്‌സുകളുടെ എണ്ണം 34 ആയി. 2014ല്‍ മക്കെല്ലം 33 സിക്‌സുകള്‍ അടിച്ചതായിരുന്നു ഇതുവരെ റെക്കോര്‍ഡ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates