തിരുവനന്തപുരം: രഞ്ജി ട്രോഫി ക്രിക്കറ്റ് ടൂര്‍ണമെന്റില്‍ കേരളം ഇന്നിറങ്ങുന്നു. കരുത്തരുടെ ഗ്രൂപ്പില്‍ പോരാട്ടത്തിനിറങ്ങുന്ന കേരളത്തിന് പഞ്ചാബ് ആണ് എതിരാളികള്‍. തിരുവനന്തപുരം തുമ്പ സെന്റ് സേവ്യേഴ്‌സ് ഗ്രൗണ്ടില്‍ രാവിലെ 9.30 മുതലാണ് മത്സരം.
സച്ചിന്‍ ബേബിയാണ് കേരള ടീമിനെ നയിക്കുന്നത്. പരിചയസമ്പന്നരായ മൂന്നു മറുനാടന്‍ താരങ്ങള്‍ ടീമിലുണ്ട്. ദീര്‍ഘകാലമായി കേരളത്തിനു വേണ്ടി കളിക്കുന്ന മധ്യപ്രദേശുകാരനായ ഓള്‍റൗണ്ടര്‍ ജലജ് സക്‌സേനയ്ക്ക് പുറമെ, മധ്യപ്രദേശിന്റെ ആദിത്യ സര്‍വതെ (ഓള്‍റൗണ്ടര്‍), തമിഴ്‌നാടിന്റെ ബാബ അപരാജിത് ( ബാറ്റര്‍) എന്നിവരാണ് ഈ സീസണില്‍ കേരളത്തിനും വേണ്ടി ഇറങ്ങുന്നത്.
കേരള ക്രിക്കറ്റ് ലീഗില്‍ തിളങ്ങിയ രോഹന്‍ കുന്നുമ്മല്‍, മുഹമ്മദ് അസ്ഹറുദ്ദീന്‍, വിഷ്ണു വിനോദ് തുടങ്ങിയവര്‍ ടീമിലുണ്ട്. ബൗളിങ്ങില്‍ ബേസില്‍ തമ്പി, എം ഡി നിധീഷ്, കെ എം ആസിഫ് എന്നിവരും ഇറങ്ങുന്നു. മുന്‍ ഇന്ത്യന്‍ താരം അമയ് ഖുറേസിയയാണ് കേരളത്തിന്റെ പരിശീലകന്‍.
ഐപിഎല്ലിലൂടെ ശ്രദ്ധേയനായ പ്രഭാസിമ്രന്‍ സിങ് ആണ് പഞ്ചാബ് ടീമിനെ നയിക്കുന്നത്. സയ്യിദ് മുഷ്താഖ് അലി ടി20 ടൂര്‍ണമെന്റ് ചാംപ്യന്മാരായ പഞ്ചാബ് ടീ കരുത്തുറ്റ നിരയുമാണ് രഞ്ജിക്കിറങ്ങുന്നത്. മുന്‍ ഇന്ത്യന്‍ താരം വസിം ജാഫറാണ് പഞ്ചാബ് പരിശീലകന്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates