അഡ്‌ലെയ്ഡ്: ഓസ്‌ട്രേലിയക്കെതിരായ പരമ്പരയിലൂടെ ഇന്ത്യയുടെ ഏകദിന നായകനായി ശുഭ്മാന്‍ ഗില്‍ അരങ്ങേറിയിരുന്നു. ആദ്യ പോരാട്ടം പക്ഷേ നായകനെന്ന നിലയില്‍ ഗില്ലിനു നിരാശയായി. കരിയറിന്റെ സായാഹ്നത്തില്‍ നില്‍ക്കുന്ന മുന്‍ ക്യാപ്റ്റന്‍ രോഹിത് ശര്‍മയ്‌ക്കൊപ്പം ഗില്‍ ഓപ്പണിങ് ഇറങ്ങുകയായിരുന്നു. ഇരുവര്‍ക്കും പക്ഷേ തിളങ്ങാനായില്ല. രോഹിത് 8 റണ്‍സും ഗില്‍ 10 റണ്‍സുമെടുത്തു മടങ്ങി. രണ്ടാം പോരാട്ടം ഈ മാസം 23നു അഡ്‌ലെയ്ഡില്‍ അരങ്ങേറും. മത്സരത്തിലും ശ്രദ്ധാകേന്ദ്രം ഇന്ത്യയുടെ മുന്‍ നായകനും ഇപ്പോഴത്തെ നായകനും ചേരുന്ന ഓപ്പണിങ് തന്നെ.

ഇരുവരും ചേർന്നു നേരത്തെയും ഇന്ത്യക്കായി ഓപ്പണിങ് ഇറങ്ങിയിട്ടുണ്ട്. ഏകദിനത്തിലായിരുന്നില്ല അത്. ഒരു ടി20 മത്സരത്തിലായിരുന്നു. അത്തരത്തിൽ ഓപ്പണിങ് ഇറങ്ങിയ അഫ്​ഗാനിസ്ഥാനെതിരായ പോരാട്ടത്തിൽ രോഹിത് ആദ്യ പന്തിൽ തന്നെ റണ്ണൗട്ടായി മടങ്ങുന്നതിന്റെ വിഡിയോ ഇപ്പോൾ വീണ്ടും വൈറലായിട്ടുണ്ട്. ഗില്ലിനൊപ്പം ബാറ്റ് ചെയ്യുന്നതിനിടെ രോഹിത് റണ്ണൗട്ടാകുന്നതും താരം ഗില്ലിനോടു കലിപ്പിച്ച് പവലിയനിലേക്കു നടക്കുന്നതിന്റേയും വിഡിയോയാണ് വൈറലായത്.

ഓസ്ട്രേലിയക്കെതിരായ ഒന്നാം ഏകദിനത്തിൽ ഇരുവരും ബാറ്റിങിൽ പരാജയപ്പെട്ടതിനു പിന്നാലെയാണ് ഈ വിഡിയോ പ്രചരിച്ചു തുടങ്ങിയത്. ഇരുവരും അധികം മത്സരങ്ങളിൽ ഓപ്പണിങിൽ ഒരുമിച്ചെത്തിയിട്ടില്ല. രണ്ടാം ഏകദിനത്തിനു മുൻപായി ഇരുവരും തമ്മിലുള്ള ഏകോപനം ശക്തിപ്പെടുത്തണമെന്നു ഓർമിപ്പിച്ചാണ് ആരാധകർ ഈ വിഡിയോ പങ്കിടുന്നത്.

അഫ്ഗാനിസ്ഥാനെതിരായ ഒരു ടി20 മത്സരത്തിലെ സംഭവങ്ങളാണ് ആരാധകര്‍ വീണ്ടു കുത്തിപ്പൊക്കിയത്. മത്സരത്തില്‍ അഫ്ഗാനിസ്ഥാനെ 5 വിക്കറ്റ് നഷ്ടത്തില്‍ 158 റണ്‍സെ നിലയില്‍ ഒതുക്കാന്‍ ഇന്ത്യക്കായിരുന്നു. റണ്‍ ചെയ്‌സിനിറങ്ങിയ ഇന്ത്യയ്ക്കു അതിവേഗം രോഹിതിനെ നഷ്ടമായി. താരം 1 പന്തില്‍ റണ്ണൊന്നുമില്ലാതെ മടങ്ങി.

ഫസല്‍ഹഖ് ഫാറൂഖി എറിഞ്ഞ പന്തില്‍ രോഹിത് മിഡ് ഓഫിലേക്ക് കരുത്തുറ്റ ഒരു ഷോട്ടടിക്കുന്നു. നോണ്‍ സ്‌ട്രൈക്കറായി നിന്ന ഗില്‍ ആകാട്ടെ പന്ത് പോകുന്നതും നോക്കി നിന്നു ഓടാന്‍ വൈകി. അപ്പോഴേക്കും രോഹിത് പിച്ചിന്റെ പകുതി പിന്നിട്ടിരുന്നു. ഫീല്‍ഡിങ് ചെയ്യുകയായിരുന്ന ഇബ്രാഹിം സാദ്രാന്‍ പന്ത് തടഞ്ഞ് നേരെ കീപ്പര്‍ക്ക് കൈമാറുന്നു. അപ്പോഴേക്കും രോഹിത് നോണ്‍ സ്‌ട്രൈക്കിലെ ക്രീസിലെത്തിയിരുന്നു. അപ്പോഴും ഗില്‍ ഓടാതെ നില്‍ക്കുകയായിരുന്നു.

രോഹിത് തിരിച്ചോടാന്‍ തുനിയുമ്പോഴേക്കും റണ്ണൗട്ട് സംഭവിച്ചിരുന്നു. ഇതോടെയാണ് രോഹിത് ഗില്ലിനോടു കടുപ്പിച്ചത്. എന്തൊക്കയോ ഗില്ലിനോടു പറഞ്ഞു കട്ടക്കലിപ്പിലാണ് രോഹിത് ഡഗൗട്ടിലേക്ക് മടങ്ങിയത്.