പാള്‍: സൗത്ത് ആഫ്രിക്കയ്ക്ക് എതിരായ പരമ്പരയിലെ രണ്ടാം ഏകദിനം ഇന്ന്. പരമ്പര നഷ്ടപ്പെടാതിരിക്കാന്‍ ഇന്ത്യക്ക് ഇന്ന് ജയം അനിവാര്യമാണ്. ആദ്യ ഏകദിനത്തില്‍ 31 റണ്‍സിന്റെ തോല്‍വി ഇന്ത്യ വഴങ്ങിയിരുന്നു. 

ശിഖര്‍ ധവാനും കോഹ് ലിയും ശാര്‍ദുളുമാണ് ആദ്യ ഏകദിനത്തില്‍ ബാറ്റിങ്ങില്‍ ഇന്ത്യക്കായി തിളങ്ങിയത്. മധ്യനിരയില്‍ ശ്രേയസും പന്തും വെങ്കടേഷും നിരാശപ്പെടുത്തി. ഡ്യുസനും ബവുമയും ചേര്‍ന്ന് ഇരട്ട സെഞ്ചുറി കൂട്ടുകെട്ട് പടുത്തുയര്‍ത്തുന്നത് തടയാനും ഇന്ത്യ ബൗളര്‍മാര്‍ക്ക് കഴിഞ്ഞില്ല. 

സൂര്യകുമാര്‍ യാദവിനെ പ്ലേയിങ് ഇലവനില്‍ ഉള്‍പ്പെടുത്തണം എന്ന ആവശ്യം ഉയരുന്നുണ്ട്. ഹര്‍ദിക്കിന് പകരം ഫാസ്റ്റ് ബൗളിങ് ഓള്‍റൗണ്ടറെ തേടുന്ന ഇന്ത്യ എന്തുകൊണ്ട് വെങ്കടേഷ് അയ്യരെ ആദ്യ ഏകദിനത്തില്‍ ബൗള്‍ ചെയ്യിപ്പിച്ചില്ല എന്ന ചോദ്യവും ഉയരുന്നു. 

രണ്ടാം ഏകദിനത്തിലും തോറ്റ് പരമ്പര നഷ്ടപ്പെട്ടാല്‍ നായകന്‍ രാഹുലിന് അത് വലിയ തിരിച്ചടിയാവും. ക്യാപ്റ്റന്‍ സ്ഥാനത്ത് രാഹുലിന് ആദ്യ ജയം തൊടാനായിട്ടില്ല. വാന്‍ഡറേഴ്‌സ് ടെസ്റ്റില്‍ രാഹുല്‍ ഇന്ത്യയെ നയിച്ചപ്പോഴും തോല്‍വിയിലേക്ക് വീണിരുന്നു. രാഹുലിന്റെ ക്യാപ്റ്റന്‍സിക്ക് എതിരെ വിമര്‍ശനവും ശക്തമാണ്. 

ആദ്യ ഏകദിനത്തില്‍ അവസാന ഓവറുകളില്‍ ശാര്‍ദുലിനെ കൊണ്ട് എറിയിച്ചതുള്‍പ്പെടെ രാഹുലിന്റെ ക്യാപ്റ്റന്‍സിയിലെ വീഴ്ചകളായി ചൂണ്ടിക്കാണിക്കപ്പെടുന്നു. ഇന്ത്യയുടെ സ്പിന്‍ സഖ്യം അശ്വിനും ചഹലും ആദ്യ ഏകദിനത്തില്‍ മിന്നിയില്ല.