അഹമ്മദാബാദ്: ഇംഗ്ലണ്ടിനെതിരായ ടെസ്റ്റ് പരമ്പരയിലെ മിന്നും പ്രകടനം ആര്‍ അശ്വിന് ടി20 ടീമില്‍ ഇടം നേടിക്കൊടുക്കുമോ എന്ന ചോദ്യങ്ങള്‍ക്ക് വിരാട് കോഹ്‌ലിയുടെ മറുപടി. അശ്വിന്‍ ഇംഗ്ലണ്ടിനെതിരായ പരമ്പരയില്‍ ടി20 ടീമിലേക്ക് എത്താനുള്ള സാധ്യതകള്‍ കോഹ്‌ലി തള്ളി. 

വാഷിങ്ടണ്‍ സുന്ദര്‍ ടി20യില്‍ മികച്ച പ്രകടനം പുറത്തെടുക്കുന്നുണ്ടെന്നും, ഒരേ ശൈലിയിലെ രണ്ട് കളിക്കാരെ ടീമില്‍ ഉള്‍പ്പെടുത്തുക സാധ്യമല്ലെന്നും കോഹ്‌ലി പറഞ്ഞു. അതല്ലെങ്കില്‍ വാഷിങ്ടണ്‍ സുന്ദര്‍ അത്രയും മോശമായി പന്തെറിയണം. ഇത്തരം ചോദ്യങ്ങള്‍ ചോദിക്കുമ്പോള്‍ സാമാന്യ ബുദ്ധി ഉപയോഗിക്കണം. ചോദിക്കാന്‍ എളുപ്പമാണ് എന്നും കോഹ് ലി പറഞ്ഞു.

2017ലാണ് അശ്വിന്‍ അവസാനമായി ഇന്ത്യന്‍ കുപ്പായത്തില്‍ വൈറ്റ്‌ബോള്‍ ക്രിക്കറ്റ് കളിച്ചത്. ചഹല്‍, കുല്‍ദീപ് എന്നിവരുടെ വരവോടെ അശ്വിന് സ്ഥാനം നഷ്ടപ്പെട്ടു. അശ്വിനൊപ്പം ജഡേജയും വൈറ്റ്‌ബോള്‍ ടീമില്‍ നിന്ന് മാറ്റിനിര്‍ത്തപ്പെട്ടിരുന്നു. എന്നാല്‍ ജഡേജയ്ക്ക് ഇന്ത്യന്‍ നീല കുപ്പായത്തിലേക്ക് മടങ്ങിയെത്താന്‍ കഴിഞ്ഞെങ്കിലും അശ്വിന്‍ ടെസ്റ്റിലേക്ക് മാത്രമായി ഒതുങ്ങി. 

111 ഏകദിനങ്ങള്‍ അശ്വിന്‍ ഇന്ത്യക്ക് വേണ്ടി കളിച്ചിട്ടുണ്ട്. 150 വിക്കറ്റാണ് ഏകദിനത്തില്‍ അശ്വിന്റെ പേരിലുള്ളത്. 46 ടി20യില്‍ നിന്ന് 52 വിക്കറ്റും ചെന്നൈ ഓഫ് സ്പിന്നര്‍ പിഴുതു. ഇംഗ്ലണ്ടിനെതിരായ ടെസ്റ്റ് പരമ്പരയില്‍ ബാറ്റിങ്ങിലും ബൗളിങ്ങിലും മികവ് കാണിച്ചാണ് അശ്വിന്‍ തിളങ്ങിയത്. ഇതോടെ വൈറ്റ്‌ബോള്‍ ടീമിലേക്ക് അശ്വിനെ തിരികെ കൊണ്ടുവരണം എന്ന മുറവിളി ഉയര്‍ന്നു.