ലഖ്‌നൗ: ഓസ്‌ട്രേലിയ എ ടീമിനെതിരായ രണ്ടാം ടെസ്റ്റ് ആരംഭിക്കുന്നതിന് മണിക്കൂറുകള്‍ക്ക് മുമ്പ് ക്യാപ്റ്റന്‍ സ്ഥാനം ഒഴിഞ്ഞ് ശ്രേയസ് അയ്യര്‍. ടീം ക്യാംപ് വിട്ട അയ്യര്‍ ഇന്ന് തുടങ്ങിയ രണ്ടാം ടെസ്റ്റില്‍ കളിക്കുന്നില്ല.വ്യക്തിപരമായ ചില കാരണങ്ങളാല്‍ ശ്രേയസ് അയ്യര്‍ ലക്‌നൗവിലെ ടീം ക്യാംപ് വിട്ടെന്നാണ് അനൗദ്യോഗികമായ വിവരം. ശ്രേയസിന്റെ അഭാവത്തില്‍ യുവതാരം ധ്രുവ് ജുറേലാണു ടീമിനെ നയിക്കുന്നത്.

ശ്രേയസ് അയ്യര്‍ ടീം വിടാനുള്ള കാരണം എന്താണെന്ന് താരമോ, ബിസിസിഐയോ പ്രതികരിച്ചിട്ടില്ല. ശ്രേയസ് അയ്യര്‍ മുംബൈയിലേക്കു പോയതായും സിലക്ടര്‍മാരെ ഇക്കാര്യം അറിയിച്ചിട്ടുണ്ടെന്നുമാണ് ഇന്ത്യന്‍ ക്രിക്കറ്റ് ടീം മാനേജ്‌മെന്റില്‍നിന്നുള്ള പ്രതികരണം. വെസ്റ്റിന്‍ഡീസിനെതിരായ ടെസ്റ്റ് പരമ്പരയില്‍ ശ്രേയസ് ഇന്ത്യന്‍ ടീമിലേക്കു തിരിച്ചെത്തുമെന്നായിരുന്നു ആരാധക പ്രതീക്ഷ. അതിനിടെയാണ് ശ്രേയസ് ഇന്ത്യ എ ക്യാപ്റ്റന്‍സി ഒഴിഞ്ഞത്.

ഓസ്‌ട്രേലിയ എ ടീമിനെതിരായ ആദ്യ ടെസ്റ്റില്‍ ശ്രേയസിനു തിളങ്ങാന്‍ സാധിച്ചിരുന്നില്ല. രണ്ട് ഇന്നിങ്‌സുകളിലുമായി എട്ട്, 13 റണ്‍സുകളാണു താരം നേടിയത്. ട്വന്റി20യില്‍ ഇംഗ്ലണ്ടിനെതിരായ പര്യടനത്തിലും ഏഷ്യാ കപ്പ് ടീമിലേക്കും ശ്രേയസിനെ ബിസിസിഐ പരിഗണിച്ചിരുന്നില്ല. കഴിഞ്ഞ ഐപിഎലില്‍ തകര്‍ത്തടിച്ച താരം, പഞ്ചാബ് കിങ്‌സിനെ ഫൈനല്‍ വരെയെത്തിച്ചിരുന്നു.