ചണ്ഡ‍ീ​ഗഢ്: പഞ്ചാബിലെ ആഭ്യന്തര ടി20 പോരാട്ടമായ ഷേർ ഇ പഞ്ചാബ് ടി20 ലീ​ഗ് 2026 പോരാട്ടത്തിൽ കളിക്കാനൊരുങ്ങി ഇന്ത്യൻ ക്യാപ്റ്റൻ ശുഭ്മാൻ ​ഗിൽ. ഫസിൽക്ക ഫാൽക്കൺസ് ടീമിനൊപ്പം ചേർന്ന് ഇന്ത്യൻ ക്യാപ്റ്റൻ പരിശീലനവും ആരംഭിച്ചു. ടൂർണമെന്റിൽ 3 മത്സരങ്ങൾ പൂർത്തിയാക്കിയതിൽ രണ്ട് കളികളും തോറ്റ് ഒരു മത്സരത്തിൽ മാത്രം ജയിച്ചു നിൽക്കുന്ന ടീമിന് ​ഗില്ലിന്റെ വരവ് വലിയ ഊർജ്ജമാകും. തിരക്കിട്ട അന്താരാഷ്ട്ര മത്സരങ്ങൾക്ക് ഇടവേള വന്നതിനു പിന്നാലെയാണ് ഇന്ത്യൻ ഏകദിന, ടെസ്റ്റ് ക്യാപ്റ്റൻ ആഭ്യന്തര ടി20 പോരിനായി ജന്മനാട്ടിൽ തിരിച്ചെത്തിയത്.

​ഗില്ലിനു പുറമെ ഓപ്പണർ അഭിഷേക് ശർമ, പേസർ അർഷ്ദീപ് സിങ് എന്നിവരും വിവിധ ടീമുകൾക്കായി ടൂർണമെന്റ് കളിക്കുന്നുണ്ട്. ​ഗില്ലിന്റെ അഭാവത്തിൽ സൻവീർ സിങാണ് ടീമിനെ ആദ്യ മൂന്ന് മത്സരങ്ങളിൽ നയിച്ചത്. ​ഗിൽ തിരിച്ചെത്തിയതോടെ ടീമിന്റെ ക്യാപ്റ്റൻ സ്ഥാനവും ​ഇന്ത്യൻ നായകൻ ഏറ്റെടുക്കും.

മൂന്ന് കളിയിൽ ഒരു ജയവും രണ്ട് തോൽവികളുമായി ഫസിൽക്ക ഫാൽക്കൺസ് നിലവിൽ അഞ്ചാം സ്ഥാനത്താണ്. ടൂർണമെന്റിൽ ആറ് ടീമുകളാണ് മാറ്റുരയ്ക്കുന്നത്. ​ഇന്ത്യയുടെ ടെസ്റ്റ്, ഏകദിന ടീം നായകനാണെങ്കിലും ടി20യിൽ അദ്ദേഹം ഇന്ത്യൻ ടീമിന്റെ ഭാ​ഗമല്ല. ഈ ഫോർമാറ്റിലേക്ക് തിരിച്ചെത്താനുള്ള അവസരമായാണ് ​ഗിൽ ടൂർണമെന്റിനെ കാണുന്നത്.

ഐപിഎല്ലിലാണ് ടി20 ഫോർമാറ്റിൽ ​ഗിൽ അവസാനം കളിച്ചത്. ഇക്കഴിഞ്ഞ ഐപിഎൽ സീസണിൽ 16 മത്സരങ്ങളിൽ നിന്നു 45.75 ശരാശരിയിൽ 196.22 സ്ട്രൈക്ക് റേറ്റിൽ 732 റൺസാണ് ​ഗിൽ അടിച്ചുകൂട്ടിയത്. 104 റൺസാണ് ഉയർന്ന സ്കോർ. സീസണിൽ ടീമിനെ ഫൈനൽ വരെ എത്തിക്കുന്നതിലും താരം നിർണായകമായി. ഫൈനലിൽ ആർസിബിയോട് പരാജയപ്പെട്ട് റണ്ണേഴ്സ് അപ്പായാണ് ​ഗുജറാത്ത് ടൈറ്റൻസ് സീസൺ അവസാനിപ്പിച്ചത്.