ദുബായ്: ഇന്ത്യയുടെ ടെസ്റ്റ് നായകനായി അരങ്ങേറി അവിസ്മരണീയ ബാറ്റിങുമായി ഇംഗ്ലീഷ് കളം വാണ ക്യാപ്റ്റന്‍ ശുഭ്മാന്‍ ഗില്ലിന് മറ്റൊരു നേട്ടം. ഐസിസിയുടെ ജൂലൈ മാസത്തിലെ മികച്ച പുരുഷ താരത്തിനുള്ള പുരസ്‌കാരത്തിനു ഗില്‍ അര്‍ഹനായി. ഇംഗ്ലണ്ട് ക്യാപ്റ്റന്‍ ബെന്‍ സ്റ്റോക്‌സ്, ദക്ഷിണാഫ്രിക്കയുടെ വിയാന്‍ മള്‍ഡര്‍ എന്നിവരെ പിന്തള്ളിയാണ് ക്യാപ്റ്റന്‍ ഗില്‍ പുരസ്‌കാരം സ്വന്തമാക്കിയത്.

ചരിത്രമെഴുതിയാണ് പുരസ്‌കാര നേട്ടം എന്നതും ശ്രദ്ധേയം. ഇത് നാലാം തവണയാണ് ഗില്‍ മികച്ച താരമാകുന്നത്. ഇതാദ്യമായാണ് ഒരു പുരുഷ താരം ഐസിസിയുടെ മികച്ച താരത്തിനുള്ള പുരസ്‌കാരം നാല് തവണ സ്വന്തമാക്കുന്നത്. നേരത്തെ 2023 ജനുവരി, സെപ്റ്റംബര്‍ മാസങ്ങളില്‍ താരം പുരസ്‌കാരം നേടിയിരുന്നു. ഈ വര്‍ഷം ഫെബ്രുവരിയിലെ മികച്ച താരവും ഗില്‍ തന്നെയായിരുന്നു.

ഇംഗ്ലണ്ടിനെതിരായ ടെസ്റ്റ് പരമ്പരയില്‍ ഏറ്റവും കൂടുതല്‍ റണ്‍സെടുത്ത താരം ഗില്ലാണ്. 75.4 ശരാശരിയില്‍ ഒരു ഇരട്ട ശതകമുള്‍പ്പെടെ നാല് സെഞ്ച്വറികളടക്കം 754 റണ്‍സാണ് ഗില്‍ നേടിയത്. എഡ്ജ്ബാസ്റ്റണ്‍ ടെസ്റ്റിന്റെ ഒന്നാം ഇന്നിങ്‌സില്‍ ഇരട്ട സെഞ്ച്വറിയും (269) രണ്ടാം ഇന്നിങ്‌സില്‍ (161) സെഞ്ച്വറിയും നേടി താരം കത്തും ഫോമില്‍ ബാറ്റ് വീശി.

വനിതകളില്‍ സോഫിയ

വനിതകളിലെ മികച്ച താരമായി ഇംഗ്ലണ്ടിന്റെ സോഫിയ ഡങ്ക്‌ലി തിരഞ്ഞെടുക്കപ്പെട്ടു. സഹ താരം തന്നെയായ സോഫി എക്ലസ്റ്റന്‍, അയര്‍ലന്‍ഡ് ക്യാപ്റ്റന്‍ ഗാബി ലെവിസ് എന്നിവരെ പിന്തള്ളിയാണ് സോഫിയ പിരസ്‌കാരം സ്വന്തമാക്കിയത്. ഇന്ത്യക്കെതിരായ പരിമിത ഓവറിലെ മികവാണ് സോഫിയയെ നേട്ടത്തിലെത്തിച്ചത്. ടി20 പരമ്പരയിലെ ടോപ് സ്‌കോറര്‍ താരമായിരുന്നു.