സിഡ്നി: അലൻ ബോർഡർ ഫീൽഡിൽ നടന്ന രണ്ടാം ഏകദിനത്തിൽ ഓസ്ട്രേലിയക്കെതിരെ ചരിത്ര നേട്ടവുമായി ബം​ഗ്ലാ​ദേശ് വനിതാ താരം ശോഭന മോസ്താരി. തന്റെ കന്നി അന്താരാഷ്ട്ര സെഞ്ച്വറി നേട്ടത്തിനൊപ്പം ഓസ്ട്രേലിയക്കെതിരെ അന്താരാഷ്ട്ര പോരാട്ടത്തിൽ സെഞ്ച്വറി നേടുന്ന ആദ്യ ബം​ഗ്ലാദേശ് വനിതാ താരമെന്ന അനുപമ റെക്കോർഡും താരം സ്വന്തം പേരിൽ എഴുതി ചേർത്ത് കന്നി ശതകം അവിസ്മരണീയമാക്കി.

134 പന്തുകൾ നേരിട്ട് താരം 118 റൺസുകൾ അടിച്ചെടുത്തു. 18 ഫോറുകൾ അടങ്ങുന്നതായിരുന്നു ഇന്നിങ്സ്. താരത്തിന്റെ കരുത്തിൽ ബം​ഗ്ലാദേശ് നിശ്ചിത ഓവറിൽ 6 വിക്കറ്റ് നഷ്ടത്തിൽ 220 റൺസെടുത്തു. ഓസ്ട്രലിയൻ വനിതകൾ പക്ഷേ മത്സരം വിജയിച്ചു. ജോർജിയ നേടിയ 97 പന്തിൽ 131 റൺസ് ശതക ബാറ്റിങ് ബലത്തിൽ ഓസീസ് വനിതകൾ ഒറ്റ വിക്കറ്റ് നഷ്ടത്തിൽ 222 റൺസ് എടുത്ത് മത്സരം 9 വിക്കറ്റിന് സ്വന്തമാക്കി.

ടോസ് നേടി ഓസ്ട്രേലിയ ബാറ്റിങ് തിരഞ്ഞെടുക്കുകയായിരുന്നു. 8 റൺസിനിടെ 3 വിക്കറ്റ് നഷ്ടമായി തകർന്ന ബം​ഗ്ലാ വനിതകളെ ക്യാപ്റ്റൻ നി​ഗർ സുൽത്താനയ്ക്കൊപ്പം ഉറച്ചു നിന്ന് ശോഭന ഉയർത്തിക്കൊണ്ടു വന്നു. ഇരുവരും ചേർന്നു നാലാം വിക്കറ്റിൽ 195 റൺസിന്റെ നിർണായക സ്കോർ ബോർഡിൽ ചേർത്തു. 114 പന്തിൽ 74 റൺസാണ് നി​ഗർ സുൽത്താന അടിച്ചത്.

ശോഭന- നി​ഗർ കൂട്ടുകെട്ടും ഒരു റെക്കോർഡ് നേട്ടത്തിലെത്തി. ഏകദിന ക്രിക്കറ്റിൽ ഏതൊരു വിക്കറ്റിലേയും ബം​ഗ്ലാദേശിന്റെ ഉയർന്ന കൂട്ടുകെട്ടു കൂടിയാണ് ഈ 195 റൺസ്. 2025ൽ തായ്ലൻഡിനെതിരെ മൂന്നാം വിക്കറ്റിൽ നി​ഗർ സുൽത്തനയും ശർമിൻ അക്തറും ചേർന്നു നേടിയ 152 റൺസായിരുന്നു നേരത്തെയുള്ള റെക്കോർഡ്.

ഇന്നിങ്സിലുടനീളം സംയമനവും ദൃഢനിശ്ചയവും പ്രകടിപ്പിച്ച കിടിലൻ ബാറ്റിങാണ് 24കാരിയായ ശോഭന പുറത്തെടുത്തത്. അവിസ്മരണീയ പോരാട്ടമാണ് ശോഭനയും നി​ഗറും ചേർന്ന് നടത്തിയത്. നി​ഗറിന്റെ പേരിലായിരുന്നു ഇതുവരെ ഓസ്ട്രേലിയക്കെതിരെ ഒരു ബം​ഗ്ലാദേശ് വനിതാ താരത്തിന്റെ ഏറ്റവും ഉയർന്ന സ്കോറിന്റെ (63 റൺസ്) റെക്കോർഡ്.